Ilir Loku - Nga dje, sot dhe nesër "Thirja e dasmës"

"NGA DJE SOT DHE NESËR"
Koncepti dhe koreografia: Ilir Loku
Shfaqje Diplome Master në "Koreografi dhe Mësuesi"
Udhëheqës Diplome: Prof. Asc. Dr. Artan Ibershimi.
Kjo shfaqje zbuloi karakteristikat më të veçanta të dasmave, zakoneve, këngëve, valleve dhe riteve përmes psikologjisë kulturore të jetesës së shqiptarëve në Maqedoninë e Veriut. Gjuha kërcyese citoi, përpunoi dhe zhvilloi në mënyrë të kujdesshme motivet vallëzuese të krahinave të ndyshme, të cilat morën një ridimensionim artistik duke u pasuruar emocionalisht por edhe teknikisht.
Qëllimi i kësaj shfaqje ishte qasja koreografike që u fokusua tek vallja folklorike, pikërisht aty ku gjallon shpirti shqiptar dhe ku gjeneza e tij frymon nga një prejardhje etnike shqiptare.
Promovimi i vlerave artistike dhe identitare të vallëzimit popullor shqiptar. Gjetja e mënyrave të reja kompozicionale të shprehjeve artistike të trashëgimisë folklorike burimore. Krijimi i një tradite kulturore të orientuar në perspektivën e një zhvillimi kulturoro-artistik dhe eksplorimi i formave alternative të produktit artistiko koreografik dhe krijimi i hapësirave të reja për promovimin e modeleve të shumëllojshme koreografike.
Konceptualisht ky krijim koreografik ështe mbështetur në përdorimin dhe ndërthurjen dramaturgjike të disa elementeve artistike që janë :Teksti plastik i trevave të ndryshme etnokoreografike, i cili kishte së pari trajtimin folklorik (#dje), trajtimin e përpunuar (#sot) dhe trajtimin e një karakteri evoluimi etnik (#nesër).
Nga pikpamja konceptuale ky projekt ishte mbështetur mbi një teren thellësisht etnokoreografik me një këndvështrim kompozicional në formën e një trajtimi varacional të substancës të repertorit të valleve folklorike të zonave etnokoreografike. E thënë ndryshe struktura kompozicionale erdhi si një panoramë që pasqyroi ngjyrimet plastiko kërcyese të kësaj pasurie të trashëgimisë shpirtërore shqiptare në një ridimensionim artistiko-teknik.
Në kuptimin e identifikimit të formës kompozicionale, ky spektakël etnokoreografik i është referuar një skene koreografike, ku boshti i veprimit dramaturgjik ishte rezultati i ndërthurjes të tekstit folklorik të seleksionuar dhe reflektimit plastiko kërcyes të pasuruar emocionalisht dhe teknikisht nga ajo që ka qënë, në atë që është sot dhe në atë që mund apo duhet të jetë edhe nesër.
Pjesmarës:
▪️Universiteti i Arteve, Tirane
▪️Teatri Kombetar i Operas, Baletit dhe Ansamblit Popullor
▪️Ansambli shtetëror i këngëve dhe valleve popullore shqiptare në RMV
🏯Teatri Shqiptar - Shkup
🧥Dizajnimi i Kostumeve: Alejna Mamuti
📸 Video: Studio Pixel - Patriott Osmani