Imirimo yo kubaka Ellen DeGeneres Campus irimo kugana ku musozo

Mu minsi mike iri imbere, mu gace ka Kinigi, mu Karere ka Musanze hazaba huzuye ikigo cy’ubushakashatsi ku kubungabunga urusobe rw’ibinyabuzima, by’umwihariko ingagi zo muri Pariki y’igihugu y’ibirunga. Ni ikigo kiswe ‘Ellen DeGeneres Campus of the Dian Fossey Gorilla Fund’.
Ni ikigo cyitiriwe Ellen DeGeneres, kikazakorana n’umushinga “Dian Fossey Gorilla Fund”, watangijwe na Dian Fossey benshi bamenye ku izina rya Nyiramacibiri. Ubwo imirimo yo kubaka iki kigo yatangiraga mu mwaka w’2020, intego kwari ugutanga akazi n’ubumenyi ku baturage baturiye agace karimo kubakwamo iki kigo.
Abaturage bagera ku 15,000 ni bo bahawe akazi ko kubaka iki kigo.
Abenshi batangiye ari abayede ariko kugeza ubu, abagera kuri 600 barimo abagore 200, bamaze kuhungukira ubundi bumenyi mu bijyanye n’igifundi, ububaji n’indi myuga itandukanye.