Рет қаралды 32,509
Ողջույն սիրելի բարեկամներ: Այսօր Ավագ Ուրբաթ է, Տեր Հիսուսի խաչելության ու թաղման օրը: Այդ օրը Տեր Հիսուսը տագնապի մեջ էր, ու մենք էլ այսօր տագնապի մեջ ենք: Աշխարհը տագնապի մեջ է: Ինչ էր անում Տեր Հիսուսը տագնապի ժամանակ:
Նա «ամբողջ հոգով էր աղոթում» (Ղկ. 22:43): Հիմա ամբողջ աշխարհը տագնապի ու վախի մեջ է: Ինչ պիտի անի մեզանից յուրաքանչյուրը սա հաղթելու համար: Ամեն մեկս պիտի ամեն օր «ամբողջ հոգով» աղոթենք:
Մի՛ վախեցեք, այլ մեր Տիրոջ պես ամբողջ հոգով աղոթեք: Սա նշանակում է աղոթել ամբողջ ուշադրությամբ և ուժերի ամբողջ լարումով՝ միտքը սևեռելով միայն աղոթքի վրա: Ձգտեք բռնել ձեր միտքը, մի թողեք այն թափառի աղոթքի ժամանակ: Սա շատ դժվար է: Այդ լարումից մարդը սկսում է քրտնել: Տեր Հիսուսը հենց այսպես էր աղոթում իր մատնության րոպեներին երբ գիտեր, որ մի քանի ժամից իրեն խաչելու են: Ղուկաս ավետարանիչն ասում է «և նրանից քրտինքը հոսում էր.... (Ղկ. 22:44):
Սիրելի հետևորդներ Քրիստոսի, դուք էլ ձգտեք այսպես աղոթել: Դա գործուն աղոթք է: Սուրբ մարդիկ ասում են աղոթքի մեջ ամենակարևոր բանը ուշադրությունն է: Եվ այո, երբ դու փորձում ես ուշադրությունդ պահել աղոթքի մեջ, դու լարվում ես, ջերմություն ես արտադրում ու քրտնում: Դու սպառվելու աստիճան ես հասնում:
Այսօր Քրիստոսի Խաչելության օրն է: Թող ձեր այս օրն ու մտքերը տարբերվեն մնացածից:
Պետք է լրջանանք և հետևենք մեր անձերին: Մեծ բան է կատարվել, որ միայն Աստուծո Որդին կարող էր անել:
Խնդրում եմ, պատմեք մարդկանց այս մասին: Պատմեք ձեր տնեցիներին: Քրիստոսից լույս առեք ու լույս բաժանեք, ձեր խոնարհությամբ, հեզությամբ ու սիրով:
«Խաչի քո, Քրիստոս, երկիր պագանեմք եւ զսուրբ զմատնութիւնդ քո մեծացուցանեմք եւ զսուրբ զչարչարանսդ քո փառաւորեմք, եկայք հաւատացեալք երկրպագեսցուք Քրիստոսի Աստուծոյ մերոյ, վասն զի եկն ի ձեռն խաչին իւրոյ շնորհեաց պարգեւս աշխարհի: Սուրբ Աստուած, սուրբ եւ հզօր, սուրբ եւ անմահ, որ մատնեցար վասն մեր ողորմեա մեզ»: