Innu lil Sant'Anna

Innu lil Sant'Anna
Muzika: Mro. Joseph Abela Scolaro, Arr. John J. Pace
Kliem: Dun Frans Camilleri
Banda: Ghaqda Muzikali Sant'Anna Wied il-Għajn
Jekk fis-sema b'ġilji safja
Qlub il-verġni huma mdawrin
B'ward mill-isbaħ, b'ward ta' mħabba
L-ommijiet huma mżejnin.
Lilek fosthom, Anna mbierka,
Insellmulek bl-akbar ġieh
Int li tajtna Omm ħanina
Bdejt il-fidwa ta' l-erwieħ.
Rit. Ismek ħelu jinsiġlek kull tjieba
U kull grazzja li biha żżejjint
Jekk Marija bil-grazzja mimlija,
Hekk kien jixraq li mżejna tkun int.
Liema dija, liema mħabba
Xegħlu, f'darek fuq din l-art
Meta f'għaqda ma' Marija
U Ġwakkin fis-skiet inġbart.
Qalb imħeġġa, ruħ imżejna
B'għerf u imħabba tas-smewwiet
Int rabbejt l-Omm t'Alla u tagħna
Fil-qdusija ta' mħabbiet!
Rit. Ismek ħelu jinsiġlek kull tjieba
U kull grazzja li biha żżejjint
Jekk Marija bil-grazzja mimlija,
Hekk kien jixraq li mżejna tkun int.
Kemm hi sbejħa l-għaqda tagħna
B'tama sħiħa fil-Mulej!
Int tlabt bil-qalb, bil-ħeġġa
U stennejtu lill-Feddej.
Ixħet fuqna l-barka tiegħek
U għallimna lkoll nixbhuk
Fil-qdusija u fil-ġabra
Tal-qlub tagħna li jħobbuk!
Rit. Ismek ħelu jinsiġlek kull tjieba
U kull grazzja li biha żżejjint
Jekk Marija bil-grazzja mimlija,
Hekk kien jixraq li mżejna tkun int.