Рет қаралды 6,540
Бүгін - Халықаралық әйелдер күні. Барша аруларымызды көктемнің осы бір шуақты мерекесімен құттықтай отырып, алдымен тарихынан аз-кем мәлімет келтірсек. Халықаралық әйелдер күнінің шежіресі ең әуелі нәзік жандылардың шеруінен басталған. 16 сағаттық қызмет, төмен жалақы, жарықсыз, жылусыз жұмыс орны. Мұның бәрі Нью-Йорктегі тігінші әйелдердің наразылығын тудырған. Осылайша, олар 1857 жылы 8-наурыз күні Манхэттен көшелерінде көтеріліске шықты. Кейін тең құқықты талап еткен мұндай митингтер жиілеген. 1910 жылы Копенгаген қаласында өткен Халықаралық социалист әйелдер партиясының конференциясында әйелдер құқығын қорғаушы Клара Цеткиннің ұсынысы бойынша 8-наурызды Халықаралық әйелдер күні етіп тойлау туралы шешім қабылданды. Бұл үндеу дүниежүзіндегі көптеген әйелдерден қолдау тапты. Олар еңбек құқының қорғалуы мен ар-намыстың тапталмауы үшін осындай мейрамның қажет екенін алға тартты.