Рет қаралды 524
Қараған ауылы ескілікті карталарда 1900 жылдардың басынан бар. 1898 жылы Маңғыстауға генерал-губернатор Куропаткиннің тапсырмасымен келген есаул Д.Литвиннің 1902-жылы шыққан «Каспи» теңізінің шығыс жағалауындағы балық аулау және итбалық өндірісі» атты еңбегінде шағын елді мекен ретінде көрсетілген.1930-жылы осы елді мекенде Исаев атындағы балықшылар артелді құрылады, кейінірек колхоз болады. 1940-жылы оның аты өзгеріп, Каганович атындағы колхоз аталады. 1957-жылы Қазақ ССР Министрлер кеңесінің қаулысымен колхоздарды ірілендіру мақсатымен бұл колхозға Долгий жерінен «Красный долгинец» колхозы көшіріліп әкелініп, енді 20-партсъезд атындағы балықшылар колхозы болып аталады.Қарағанда құрылыс басталып, 8 жылдық мектеп, колхоз кеңсесі, дүкен, клуб, көптеген тұрғын үй салынады. Бұрынғы кішкентай ауыл үлкен де сәнді елді мекенге айналады. Бірақ, 1963-жылы колхоздар жабылып, Қараған балықшылары көбі Фортқа көшіп кетеді, малшы болады, немесе, облыстың басқа жерлеріне қоныс аударады. Сөйтіп, әп-әдемі, ірі, жайлы елді мекен қаңырап қалады.