♻ҚАЗАҚЫ САЛТ-ДӘСТҮРГЕ БЕРІК ОРЫС КЕЛІН - ВЕРА

📌Қазақ отбасына келін болып түскен орыс қызы Вера Нестерованың күнделікті тұрмыс-тіршілігін Тик-ток желісінің қолданушылары қызыға қарайды. Ауласында үй құстарын күтіп-баптаумен айналысатын келіншек қазақша еркін сөйлейді. Тіпті көпшілігі оның өз ана тілін білетініне күмәнмен қарайды.
📌Вера Нестерова қазақ тілін алты жасынан білетінін айтады. "Туып-өскен ортамның бәрі қазақ, өзім қызығып үйреніп алдым. Бала кезімде қазақ құрбыларымның сөздерін қайталап жүретінмін. Ал негізі 9 жыл орысша оқығанмын. Тек соңғы төрт жыл колледжде қазақша білім алдым", - дейді Вера.
📌Қызылорда қаласында тұратын келіншек тек қазақы ортада жүргенінен ана тілі орысшаны акцентпен сөйлейтінін жасырмады. "Орысша жақсы білемін, бірақ күнделікті сөйлемеген соң акцент бар", - дейді Вера күліп. Вера өзін әлеуметтік желіде "ұлтым - орыс, жаным - қазақ" деп таныстырады. Қазақы салт-дәстүрді ұстанатын Вера "Ата-енеме, қайын ағама, қайын әпкеме иіліп сәлем саламын. Қазақтың барлық салтын білемін. Екі үлкен қызымды бесікке салып өсірдім. Бесік жырын айтамын", - дейді ол.
📌Айтуынша, ата-енесі шаңыраққа Вера келін болып түскенде қарсылық танытпаған. "Маған қарсы болған жоқ. "Бірге тұратын екеуің" деп жолдасыма жарын таңдауда еркіндік берді", - дейді Вера Нестерова.
Qazaqstan Ұлттық Телеарнасы