კიდევ ერთხელ იერუსალიმის ჯვრის მონასტრის დაარსების ქრონოლოგიის შესახებ.

იერუსალიმის ჯვრის მონასტრის დაარსება სხვა და სხვა მასალის ანალიზის საფუძველზე ბიზანტიურ პერიოდში იგულება. არქეოლოგიური მასალა, რომელიც 1969-1973 წლებში ადგილზე წარმოებული გათხრების შედეგად მოიპოვა ბერძენმა სწავლულმა ათანასიოს იკონომოპულოსმა, მონასტრის მთავარი ტაძრის უკვე IV საუკუნის ბოლოს არსებობაზე მეტყველებს. გარდა ამისა, ამერიკელი სწავლულის დ. პალმერის მიერ გამომზეურებულ, IX საუკუნით დათარიღებულ ბერძნულ ხელნაწერში VII საუკუნისთვის ჯვრის სახელობის მონასტრის არსებობის ფაქტზე გვაქვს მითითება. ირიბი მინიშნება V საუკუნის 30-იანი წლების ბოლოს ამ მონასტრის არსებობის ფაქტზე შეგვიძლია ვიხილოთ პეტრე იბერის ბიოგრაფის იოანე რუფუსის თხზულებაშიც.
ჯვრის მონასტრის არქეოლოგიური მასალა ა. იკონომოპულოსმა თან წაიღო საბერძნეთში და მას შემდეგ ამ მასალის ადგილ-სამყოფელი ჩვენთვის უცნობია. არც არავის მოუკითხსვს ის საქართველოდან. ასევე უცნობია სად ინახება გათხრების შედეგად სამარხებში ნანახი განსვენებულთა ნეშტები, რომელთა ანალიზი იერუსალიმის ჰადასას ჰოსპიტალში მოახდინა დრ. ნიკუ ჰაასმა. ერთ-ერთი ნეშტი მონასტრის დაარსების დროინდელი იყო და ა. იკონომოპულოსის ვარაუდით, ის პირველ იღუმენს ან სულაც მონასტრის ქტიტორ საერო პირს ეკუთვნოდა. ძვლების დნმ ანალიზით და თავის ქალის ანთროპოლიგიური შესწავლის ნიადაგზე დღეს ჩვენ შეგვეძლო იმ უცნობი პირის წარმომავლობაზე წარმოდგენის შექმნა. აღნიშნული მასალის ადგილ-სამყოფლის მოძიება საშურია იმ თვალსაზრისით, რომ პასუხი გაგვეცა კითხვებზე, ვინ და სადაური იყო ჯვრის მონასტრის მესაძირკვლე პირი.