Рет қаралды 3,260
СУ «ЖЫРЫ» БІТЕР ЕМЕС
Қорғалжын ауданынан Қарағанды облысы Нұра ауданындағы ауылдарға бет алдық. Әуелі Құланөтпес ауылының тұрғындарымен кездестім. Таяуда жергілікті азаматтар өздерінің талап-тілектерін айтып, хат жолдаған еді. Аудан орталығынан 220 км, облыстан 525 км шалғай жатқан бұл ауылда 355 адам тұрады
Халықты толғандырған негізгі мәселе - таза ауыз су, сапалы жол, қолжетімді байланыс. Әсіресе су мәселесін басты назарға алдым, себебі бұған бюджеттен қыруар қаржы бөлінген. "Life Story Invest" ЖШС мердігерлік ұйымымен, "Казахстанские технологии" ЖШС қосалқы мердігерлік ұйымымен шарт жасалды. Тендерге қатысуға келгенде білек сыбана кіріскен мердігерлер іске келгенде баяу қимылдап, халықтың ашуына тиіп отыр. Мәселенің анық-қанығын өз көзіммен көру үшін мердігерлермен кездестім. Кездесуге аудан әкімі, жергілікті мәслихат депутаттары да қатысты. Әңгіме барысында екі тараптың айтқаны бір-біріне сәйкес келмеген соң, арнайы қазба жұмыстары болып жатқан жер учаскесіне бардым. Мердігер ұйым мерзімнен кешігіп жатқаны айдан анық: маусым айынан бері 15 шақырым жердің тек 1 шақырымға жетер-жетпес бөлігі ғана қазылған. Далада тек 1 түйір техника ғана жұмыс істеп тұр. Жаздың бел ортасы болды, бұл қарқынмен қар түскенге дейін үлгермеуі де мүмкін. Дабыл қаққан халықтың да, мәслихат депутатының да шағымы әбден орынды. Бұған қалай ашуланбайсың?! Арқаны кеңге салып алған мердігерлер міз бақпай отыр.
Қалада бірнеше сағат су болмай қалса, халық қалай наразы болатынын білесіздер. Ал ауылдықтар бұл суды қанша жылдан бері зарыға күтіп отыр. Неге олар үшін бұл қол жетпес дүние болу керек?! Бұлай істеуге болмайды. Осы орайда әкімдік бақылауды күшейту керек деп санаймын. Мен де бұл мәселені қадағалаймын.