"Күшіміз бірлікте"

Облысымыздың бір қатар өңірлерінде қардың қарқынды еруінен және бірнеше күн жауған жауын-шашын салдарынан елді-мекендерде су тасқыны орын алуда. Аталған төтенше жағдай Бөрлі ауданында да орын алып, тұрғындарды әбігерге салуда. Ауданымызда төтенше жағдай жарияланып, су тасқынынан зардап шеккен тұрғындар қауіпсіз аймаққа көшірілуде. "Ел басына күн туғанда қол ұшын созып, көмек көрсету әр адамның азаматтық парызы. Осы орайда мектебіміздің қызметкерлері, ата-аналары аянып қалмай, бір ауыздан аталған жағдайға байланысты көмек қолын созуда. Атап айтар болсақ, мектебіміздің ер азаматтары тасқын суды бөгеу шараларына ат салысса, әйел адамдарымыз жұмысшыларға түскі және кешкі ас дайындап, таратуда. "Жұмыла көтерген жүк жеңіл" демекші осындай бірлігі жарасқан тірлігіміздің арқасында бұл сынақтың да артта қалары сөзсіз. Ең бастысы еліміз аман, жұртымыз тыныш болсын!