კულტურა vs. ბუნება (სამოთხის ბაღის ისტორიის ჰეგელისეული ინტერპრეტაციისათვის) - მ. ბერიაშვილის ლექცია

გივი მარგველაშვილის სახელობის ლიტერატურულ-ფილოსოფიურ კვლევათა გერმანულ-ქართული ინსტიტუტის ორგანიზებით 9 მარტს, 14:00 საათზე, „კავკასიურ სახლში“ გაიმართა ფილოსოფიის პროფესორის და ჰეგელის საერთაშორისო საზოგადოების საბჭოს წევრის მამუკა ბერიაშვილის საჯარო ლექცია „კულტურა VS. ბუნება (ბიბლიური სამოთხის ბაღის ისტორიის ჰეგელისეული ინტერპრეტაციისათვის)“.
ბიბლიური სამოთხის ბაღის ისტორია/მითოსი ფილოსოფიური და კულტურ-მეცნიერული თვალსაზრისით იძლევა შესაძლებლობას მრავალი წახნაგით იქნას განხილული ადამიანის, როგორც თავისუფალი არსების თვითგანხორციელების შესაძლებლობა. იმანუელ კანტთან ეს ისტორია უფრო მეტად კულტურულ-ანთროპოლოგიური ანალიზის ფორმას იძენს, რა შემთხვევაშიც იგი აჩვენებს, რომ სამოთხის ბაღიდან გამოძევების შემდეგ, ადამიანი - თეორიულ კონტექსტში გონებრივი არსება - სწორედ ამ პროცესის შედეგად იწყებს ექსისტირებას; ხოლო პრაქტიკული თვალსაზრისით, იგი იმავდროულად შრომით აქტივობაში ერთვება.
ჰეგელისთვის ადამიანიად ყოფნის ეს კონტექსტი ძალზე მნიშვნელოვანია, თუმცა თავისი ფილოსოფიური სისტემის დიალექტიკურ-სპეკულატიური ბუნებიდან გამომდინარე, ეს მოცემულობა საკმარისი არ არის და აჩვენებს, რომ ადამიანი არა მხოლოდ მუდმივ დაპირისპირებულ ბიპოლარულ სისტემებში არსებობს, არამედ დაპირისპირება ბუნებასა და კულტურას შორის ქმნის ინტერექსისტენციალურ გარემოს, სადაც შესაძლებელია ადამიანის უმთავრესი არსის, თავისუფლების განხორციელება.

[@mananagigiberia7035]

ფილოსოფია რომ აინტერესებდეთ რაღა გვიჭირს , მაგრამ ცოტა მეტი დაფიქრების უნარი და სურვილი სჭირდება. რაც სამწუხაროდ იშვიათი გახდა და არა მარტო ჩვენთან