Рет қаралды 315,914
Жұрағат Баман, тілші
-Қымбат нөмірлерді сату акциясы басталғаннан бері екі жылда 5 млрд теңгеден астам пайда түсіпті. Ал халық арасында көп сұранысқа ие нөмірлер Алматы мен Астана қалаларында көп сатылған. Ресми ақпарды Ішкі істер министрлігінің Әкімшілік полиция комитеті келтірген. Бюджетке осыншама қомақты қаржы түскеніне қарағанда, танымал нөмірлерге сұраныс зор.
Салық Кодексінің 540-бабында белгіленген қымбат нөмірлердің бағасын тағы бір шолып шықсақ. 100-ден 900-ге дейінгі тура сандар және сандары қайталанатын 101, 202, 303 секілді, сондай-ақ, үш бірдей таңбалы 333, 444, 555 секілді мемлекеттік нөмірлер құны - 253 мың 724 теңге.
Ал нөлден басталатын 001, 002-ден 009-ға дейінгі және ең көп сұранысқа ие 777 номерінің бағасы - 422 мың 256 теңге.
Сіз әкеңіз бен анаңызға кез келген мерейтойға бірдей нөмір сыйлағыңыз келді делік. Әріптері әртүрлі, әрине. Ал таңдаған нөмір - 777. Біреуінің құны айтып өткеніміздей 422 мың 256 теңге, ал екеуі 844 512 теңге болады. Яғни екі жылда миллиардтаған қаржы қалай жиналғаны айтпаса да түсінікті.
Бастысы сатып алған қымбат нөмірлерді өмірбақи пайдалануға болады. Яғни көлігіңізді сатқан жағдайда құзырлы орындарға арыз жазып, мемлекеттік нөмірді сақтап қала аласыз.
Алайда тәртіп сақшылары әдемі нөмір аламын деп, алаяқтардың арбауына түсіп қалмауды ескертуде. Себебі қымбат нөмірлер жеке қолда емес, мамандандырылған халыққа қызмет көрсету орталықтарында ғана сатылады.