Рет қаралды 3,164
ကံအကြွေး
-----------
အရှင်ဘုရား.....
ဒီတိုင်းပြည်မှာ တော်ရုံဝဋ်ကြွေးနဲ့တော့
လူမဖြစ်တန်ကောင်းဘူး ဘုရား။
လူငယ်တွေရဲ့ လက်ဖျံရိုးကို မီးဖိုပြီး
ဆီဦးထောပတ်စားတဲ့ အကျင့်ဟာ
ပဒေသရာဇ်ခေတ်တည်းက အကျင့်ပါလာပုံရတယ် ။
ဒီကမ္ဘာမှာ ဖြစ်သမျှ စစ်ပွဲတိုင်း
လူကြီးတွေ စားပွဲဝိုင်းမှာ လက်မှတ်တစ်ချက်ထိုးကြဖို့
လူငယ့်ဦးခေါင်းခွံတွေ ဘယ်လောက်များများ
နင်းဖြတ်ကြလဲ ။
ဒီစစ်ပွဲကြီး ပြီးတဲ့အခါ
အဖေဆုံးရှုံးရသူ ကလေးငယ်ဟာ စင်မြင့်ပေါ်မှာ
သူ့အဖေကို လွမ်းကြောင်း စာစီကုံးခွင့်ရမလား
ဒီစစ်ပွဲကြီး ပြီးတဲ့အခါ
ရှိသမျှ ဆုံးရှုံးသွားသူ စစ်ရှောင်တစ်ဦးဟာ
မီဒီယာရှေ့မှာ
သူ့ပင်ပန်းဆင်းရဲမှုတွေအကြောင်း ပြန်ပြောခွင့်ရမလား
အရာရာစွန့်လွှတ်ပြီး
သုညဘဝကို ခံယူသွားတဲ့ လူတွေရော
ရှိဖူးခဲ့တဲ့ မာန်မာနကို
မေးကြောထောင်အောင် ပြောခွင့်ရမလား
ဒီစစ်ပွဲကြီး ပြီးတဲ့အခါ
တောခိုသွားတဲ့ လူငယ်အချို့ကို
စင်မြင့်ထက်မှာ စကားပြောခွင့်ပေးကြမလား
မသေချာပါဘူး....
စစ်ကြီးအတွင်း နေသာသလို ငုပ်လျှိုးသွားတဲ့
နိုင်ငံရေးသမား၊ စာရေးဆရာ၊ ကဗျာဆရာ
တေးရေးဆရာ၊ အဆိုတော်၊ သရုပ်ဆောင်
အစရှိသဖြင့်
စကားပြောကောင်းသူတွေပဲ
စင်ပေါ်မှာ အာပေါင်အာရင်းသန်သန်နဲ့
သူတို့တကယ်မကြုံဘူးတဲ့
စစ်ကြီးအကြောင်း ပြောကြလိမ့်မယ် ။
ကြားဖူးနားဝ အခက်ခဲတွေကို ပြောကြလိမ့်မယ် ။
မစိုက်ပျိုးဘဲ ရိတ်သိမ်းချင်သူတွေ
ရေမလောင်းဘဲ ခူးဆွတ်ချင်သူတွေ
ဒီလိုလူတွေက နေရာတိုင်းမှာ ရှိပါတယ် ။
အရှင်ဘုရား.....
ဒီနိုင်ငံကိုက မြေမသန့်ခဲ့တာ ထင်တယ်။
လူဖြစ်လာတဲ့ ခဏ
အမေ့ဗိုက်ထဲမှာတည်းက
ကျန်းမာရေးစောင့်ရှောက်မှု ကောင်းကောင်းမရ
မွေးဖွားပြီးနောက် မယ်လမင်းပါတဲ့နို့မှုန့်နဲ့ ကြီးခဲ့ရ။
ကလေးဘဝ
အကောင်းဆုံးမုန့်ဟာ ထက်ထက်မိုးဦးကြေငြာတဲ့
ဇီးထုပ်လောက်ပဲ ရှိခဲ့ကြ။
ဘီစကစ်နဲ့ နို့ဆီဆိုတာ နာဖျားမှ စားခွင့်ရတဲ့
ကမ္ဘာ့အလယ် အကျဥ်းကျနေတဲ့နိုင်ငံကြီး ။
လူငယ်ဘဝမှာလည်း
ဘောလုံးကွင်းကို အကွက်ရိုက်ရောင်း
အားကစားချိန်မှာ အမှိုက်ကောက်ခဲ့ရတဲ့ ဘဝနဲ့
" မြန်မာ့အားကစား ကမ္ဘာကိုလွှမ်းရမည် ”
သံပြိုင်အော်ခဲ့ကြ ။
မီးမလင်းတဲ့ ဓါတ်တိုင်တွေအောက် ဂစ်တာတီးရင်
မှောင်ရိပ်ခိုမှုနဲ့ ဖမ်းခံရတဲ့ လူငယ်ဘဝ။
တရုတ်ထုတ်ဆိုင်ကယ်တွေ ဝင်လာမှ
ဇိမ်ခံပစ္စည်းရယ်လို့
Kenbo ဆိုင်ကယ်လောက် ပိုင်ဆိုင်ခဲ့ကြတဲ့ လူငယ်တွေ။
ကမ္ဘာကြီးဟာ ရွာကြီးဖြစ်ချိန်မှာ
မျက်လုံးပွင့်မယ်ရှိသေး
အမှောင်ထုထဲ ပြန်ဆွဲချသွားတယ် ။
လူငယ်တွေ ဘာမှားခဲ့လဲ
လမ်းဘေးမှာ ဘေထုပ်ဝယ်သလို
ကိုယ်မွေးမယ့်နိုင်ငံ ကိုယ့်စိတ်ကြိုက်မှရွေးခွင့်မရှိတာ။
ဒီနိုင်ငံမှာ မွေးလာတယ်
ဒီနိုင်ငံက လူကြီးတွေအချင်းချင်း
အာဏာ၊ ပါဝါ၊ စည်းစိမ်၊ ရာထူး လုကြရင်း
နာတာရှည်ရောဂါကြီးလို ဖြစ်နေတဲ့စစ်ပွဲထဲ
ဘဝတစ်လျှောက်လုံး ပိတ်မိနေကြတယ် ။
ကိုယ်မွေးမယ့်နိုင်ငံ ကြိုရွေးခွင့်ရှိရင်
ဒီဒုက္ခတွေ ခံရမယ် မထင်ဘူး ။
ပုဂံရှိတယ်
မြောက်ဦးရှိတယ်
ဧရာဝတီရှိတယ်
ရွှေတိဂုံနဲ့ ကျိုက်ထီးရိုးရှိတယ်
ရှမ်းရိုးမ၊ ချင်းတောင်တန်းရှိတယ်။
ဒါလေးတွေကြောင့်သာ ဒီနိုင်ငံကို ချစ်ခဲ့ရတာ
တကယ့်တကယ်ကျ မွေးကတည်းက
အရာရာချို့တဲ့ ပြည်သူတွေ ။
အမိမြေက လှပါတယ်
မလှတာက လူကြီးတွေရဲ့အတ္တတွေ
ဗုဒ္ဓကို ကိုးကွယ်တာလည်း သူတို့ထိပ်ဆုံး
ဗုဒ္ဓပြောတဲ့ ငါစွဲ မပယ်နိုင်တာလည်း သူတို့ထိပ်ဆုံး ။
အရှင်ဘုရား......
တကြိမ်တခါဖြစ်ဖြစ်
တရားချချ
တန်ခိုးပြပြ
လူကြီးတွေ အသိတရားဝင်အောင်
လမ်းပြတော်မူပါ ဘုရား
လူငယ်တွေမှာ
ကိုယ့်ဓါးကိုယ်ထမ်း ကိုယ့်လမ်းကိုယ်ဖောက်ရင်း
ဖနောင့်မှာ ဆူးချက်တွေ များလှပေါ့ ။