Kapit muak ari ili, ditimpai ari remang

Renggat ti ketiga nya pemindah bansa kitai Iban dalam menua Sarawak tu empu entara taun 1850 ngagai 1900. Menua ti ditepat kitai Iban pindah ba renggat ti ketiga tu nya baka Ibau, Belawai, Yong, Sungai Kapit enggau Batang Balleh di Batang Rajang; Igan, Oya, Mukah enggau Balingian pegai menua Sibu enggau Mukah; Tatau (Anap) enggau Bintulu (nyengkaum indu Batang Kemena, Sebauh enggau Pendan) dalam menua pegai Bintulu; Tinjar enggau Baram Ili dalam menua pegai Miri ke diatu.
Iban ari Balleh mayuh nya datai ari Batang Ai, Emperan enggau Katibas sepengudah Batang Katibas ditutup perintah enda asuh alai bansa Iban diau ari taun 1876 ngagai taun 1916. Ba jaku tuai, Iban Balleh udu bejaku munyi tu, “Kitai ari Batang Ai, Munti Seni; Lubang Baya, Tapang Emperaja; Emperan Kawat, Nanga Dedat; Batang Ai, Lubuk Kelembuai; Engkari, Rantau Panjai; Nanga Tiga, Engkari Lepung; Lemanak, Lubuk Subung.”
Sekeda ari Iban Balleh bisi pulai ke Katibas baru udah bala Kumbong Apai Bakum dialahka perintah di Bukit Salong, Mujong dalam taun 1915. Dalam taun 1916, Batang Katibas dikemendarka perintah alai Iban diau dikena mechahka Iban awakka enda begempung tauka beguang ngelaban perintah baka ke udah nyadi di Mujong enggau di Gaat.
Ba ripot perintah ungkup ke taun 1919 (Third Division Annual Report For 1919) bisi nyebut munyi tu, “The Balleh and its tributaries are now cleared of all its inhabitants who, for five years, have given continual trouble. It will be necessary, if Ibans are ever allowed again to reside in this part of the country [Katibas], to garrison the district effectively, or further troubles will ensue.”
Dalam jaku Iban, genteran jaku di atas nya lebih kurang munyi tu: [Batang Balleh enggau pati-pati iya diatu udah puang ari mensia ke udu ngaga penyarut kenyau lima taun tu ke udah. Diatu menua Batang Katibas patut dibuka baru sereta dikemendarka alai bansa Iban diau tauka pindah dikena nyitak tubuh sida ngambika nyamai agi diperintah sereta dikena nyeliahka penyarut baka ke udah-udah].
Sebedau Iban pindah ke Balleh, menua Balleh endang diwan bansa Lugat tauka Lisum (nama ba perintah nya Lisum tang nama iya ba sebut kitai Iban nya Lusum), Penan Batu, Sihan, Ukit enggau Beketan.
Menua Batang Balleh terubah dibubuk Iban alai bumai iya nya dalam taun 1874 nangka Nanga Mujong dibatak Jampi, Penghulu Matahari, Penghulu Keling enggau Penghulu Kanyan ari Katibas maya bala Enjop di Katibas benung bebunuh ngelaban Rajah. Penghulu Matahari enggau Penghulu Keling tu anak Unggat tang Penghulu Keling diiru Gerinang (Nitik) laban Gerinang nadai anak.
Dalam taun 1895, Iban nebing Batang Rajang bisi ditemu perintah pindah ke Batang Sut bedarat melunggang ari Sungai Kapit. Dalam taun 1905, Penghulu Merum matak bala ari Batang Sut pindah ke Mujong. Dalam taun 1880, 1902 enggau 1904, Bukit Batu di ulu Mujong endang alai Iban betiki nirika kayau ngelaban Rajah. Sekeda ari tuai-tuai ke matak bala nirika kayau ngelaban Rajah di Bukit Batu iya nya Merum enggau menyadi iya Ajut, ditampung Ayum (Rimau Badang) enggau Janting (Lang Labang).
(Tibak jerita diambi ari bup IBAN PEGAI RAJAH BROOKE dikarang Nalong anak Buda ari Ng. Entawau, Balleh, Kapit & Johnny Anak Chuat ari Ulu Lemanak, Engkilili. Bup IBAN PEGAI RAJAH BROOKE tau dibacha/dibeli ari Google ebook)

[@HMHprospective]

Betul2 sini sana... Cantik

[@HMHprospective]

Terbang jauh ni bro.