ردية | ظافر بن جديع "رحمه الله" و عبدالله بن جعثم

بسم الله ابدا واقتبس من سورة النور اقتباس
سراني الهاجوس فالضلماء ولا ادري وش يبي
وانا عيوني تجفل من النوم وتعاف النعاس
لا مرت الايام بـ الضيقات : خوي وصاحبي
طبعي و لكنّه : لـ ناس دون ناس ، و دون ناس
و للي يـصافـيني على الدنيا .. رفيقن و أجنبي
وشلون فاللي له غلا يكسر " موازين القياس "
اعوّي عواء سـرحان يا قيفان شعري ، و اقنبي
سلام يا امير القصايد فالمديح و في الحماس
اللي شطر منها يزلزل : سوق منبر بو ظبي
يا غالب الشعّار ، يا هادم بنوك الاختلاس
يا صادق الفزعات ، يا ضـيم المزاج القلبي
يفداك ابن ثاني تميم و روؤساء فتح وحماس
و اللي يعذرب في مواقيفك ، يا قناص الضبي
المدح يثنى لك يا عبدالله ويخسون الخساس
يا مقدم "الوهّابه" اللي ودّي انّك "واهبي"
الهرج : لاما وصل للعراف ، صعب انه يحاس
مطلب صحيحين النوايا فـ الحياه و مطلبي
واللي يقول ان جده العـاشر معه رمح وطاس
قل الفتى من قال انا ليس الفتى من قال ابي
وان كان حصلته قوي راس وقوي عزمٍ و باس
فـسوّد بوجهي يبن جعثم كان ما احلق شنبي
كثر الجدال وبعض الاشياء ما وراها إلا فلاس
و العاقل اللي : منهجه شرع الله و نهج النبي
الضاهر ان الوقت الامحق فانحدار وفانتكاس
اعوذ بالله يا بعض الافكار زيحي واجنبي
حنا وقحطان العرب لا صار فالوضع التباس
درع الملك والمملكه وابليس يخسى ويهبي
انساب واصحاب وعلاقتنا على مبنى وساس
وامجادنا لـأفعولنا تنسب ولا تسبى سبي
اكبر من الالقاب والاسمى وعينينن بـراس
والراس عزّه فالمتون اللي تعزّ الـمنكبي
في هيبة الكنق المهيب اللي يروس ولا يـراس
سيف العرب سلمان خو نوره عريب المنسبي
ابو فهد لاما اعتزا جاء الارض هزّه واحتباس
يليق به شطرن : لابن جدلان سعد الاكلبي
الكايده لاما اقبلت تفطن لها الخمس الحواس
يقلط لها فاقبالها عودن على الشدّه صبي
يا خيّل العوجاء وصبّو الكيف ف راسي عماس
وانا ولد من ينطح الغارات ويقول : ارحبي
دام الذهب يبقى ذهب لو طال ما يصبح نحاس
ولي عهده .. صامل الوقفه راعي الـمجد الابي
محمد اللي يلبس .. من العز والهيبه لباس
شعبه يفاخر به .. و يفخر كل " شعبن يعربي "
و لا انت ياللي : حيلتك تشبه لـ حيلة بو نواس
شف راية التوحيد .. رفّت فـ المدار الكوكبي
ظافر بن جديع الواهبي
.
.
.
بسم الله اللي نتلمس عـفوه و رحمته إلـتماس
منه ، و إليه : نلـوذ .. ما غيره مـلاذ ، و مـهربي
سبحانه نسبّح بـحمـده .. عد ما سـاق الـيباس
والـشكر له .. و الحـمد له .. حـمداً كثيراً طيبي
حمداً يليق بـ نعمته .. و أفـضاله اللي ما تقاس
أقـل مـا فـيـهـا : سـتـر ذنــبي .. و عـلّا مـنـكـبي
أستغفره و أتوب له و إن حال دون الـياس ياس
ما أيّست من رحمته سبـحانه ، لو إني : مـذنبي
ما يقنط من الرحمة إلا ملحدٍ : " شراب كاس "
راحـت حـيـاته : لا مـعه مـله .. و لا له مـذهـبي
من بعدها : يا مقتبس من نور .. للـنور إنعكاس
وإليا أنعكس بيّـن لك المستور ، و أظهر ما غبي
معا انك يا ظافر تعرف اللي تغـبى بي ، و جـاس
و تعرف مضـمون الـرسـاله ، من قـبل لا تـكتبي
وتعرف وش قدرك بصدري جعل ما ياتيك باس
يا اقرب من : الاخ الشقيق و من ربوعي و عربي
لكنك سابقني بطيبك طيب شعر ، وطيب راس
وقرينك اطيب من قريني وانشد انشد من تبي !
أقولها صادق .. و أنا اللي ما تبع درب الـبـلاس
عيـبٍ على الـرجال يـبلس فـ العلوم .. و يكذبي
ارسلت لي ندّر بيوتٍ كلها : درّ ، و ماس
تصغي لها لاذان غصب .. و من سمعها يطربي
و عذرتني فالـرد لكن : لا رجعنا للاسـاس
انا قصيدي راس مالي .. و النشاما مكسبي
و اللي قدرني بالـقصيد .. و داس قفرٍ ما يداس
كله على شـاني و تـقـديرٍ : لـ جـهدي ، و تـعبي
عيبٍ علي اجفى ، مـراسيله .. و اخليها دساس
ما ذا : ب سلمٍ لي .. ولا سلمٍ : ل جداني و ابي
اسلومنا من طـاب فينا .. نشـهره فـوق الرواس
و نبـادله ب الـطـيب .. و نـلـبي لـ عـينه ما يبي
ما حن ب جحادة جميل و رووسنا ماهي تراس
في حاضـر الدنيا ، و في ماضي الزمان الاشـهبي
ضـيـاغمٍ لا مـن تـعـلـيـنـا عـلى : قـبّ الـفـراس
ما نـرجـع الا : كـاسـبـين .. و جمـعنا ما يـغـلبي
و دون الخوي لو نرخص الارواح ما قـلنا فـلاس
ا'قـنادنا مدّ الـجميل .. و كيـفنا مـخذ الـجبي
و انتو بعد : رووس شهران اللي يجلّون العماس
وامجادكم ما هيب في حاجة قصيدي و خطبي
امجادكم من قبل سبق ، و من قـبل تقرير واس
يشهد عليها المذحجي ، والحميري ، و التغلبي
وقسومكم ذروه سـنام .. و غيركم قسمه عفاس
ولا يشكك في غلاكم عندنا إلا : خيبي
و اللي حصل يا بو حسن : حقٍ تنكره الرجاس
بأسباب غيضٍ في صدور اهل الضغينه : يلهبي
فأما نـسيت السـالفه .. من ساسها ، و لّا تناس
جعله فداك : اللي على النمات يسعى ، و يحبي
عبدالله بن جعثم الوهابي