'Ku ka bujtë Lushi pramë' - Polifonike Dyzanshe të Veriut (ZALL-DARDHË, DIBËR, Albania)

Sherif Dervishi (1961) (Zall-Dardhë, Dibër, Albania): «Fillimet e mia kanë qenë bashkë me kolegët, me shokët e fëmijërisë në Zallë-Dardhë të Dibrës. Uleshim duke kënduar nëpër darsma dhe gjatë kësaj kohe vinte dhe i madhi Haziz Ndreu (Peshkopi, Dibër, 1935 - 2000). Ne kemi bërë darsma të mëdha nëpër dhoma dhe këndonim të gjithë me radhë sipas moshave. Haziz Ndreu, artist i madh, që unë kam nostalgji të jashtëzakonshme për atë njeri, më ka frymëzuar gjithnjë në rrugën time të muzikës duke e pasur si një udhërrëfyes. Ai më ka mësuar tamam të gjitha këngët, mënyrën e të kënduarës dibrançe dhe unë po vazhdoj në atë ritëm që kam ardhur deri sot. Këngët nga Dibra janë të bukura pasi vijnë nga një zonë që ka një larmi të ndryshme këngësh, por ne rrimë fiks në startin e këngës së Dibrës duke kujtuar dhe duke pasur në vesh gjithmonë zërin e Hazis Ndreut, dhe të këngëtarëve të tjerë para meje, por kryesisht Haziz Ndreun. Unë kam pasur fatin që përveç çiftelisë kam punuar dhe me muzikën e kultivuar, kuptohet muzikë popullore jo linjë tjetër, dhe publiku më ka pritur shumë mirë. Sherif Dervishi (1961, Zall-Dardhë, Dibër), është një këngëtar i gurrës popullore nga Zall-Dardha e Dibrës, aty ku kanë dal thuajse pjesa dërrmuese e këngëtarëve dhe valltarëve të Dibrës».