Рет қаралды 30,854
กลอนลำ : จากลำเรื่องผาแดงนางไอ่ คณะฟ้าสีคราม
หมอลำ : พิศมัย เพชรลมโชย
ทำนอง : กาฬสินธุ์
ผู้ประพันธ์กลอนลำ : เซียงคำภา ผญาย่อย
ภาพประกอบ : ศูนย์วัฒนธรรม มหาวิทยาลัยขอนแก่น
#ลำทำนองกาฬสินธุ์ #พิศมัยเพชรลมโชย #กลอนลำ
YOUTBE : @ซูนคิงตามกะเยิม #แกะกลอนลำ
โอย ฮือ... เตาะเลาะเอ๋ย เตาะเลาะใหญ่แม่พวมป้อย
เตาะเลาะน้อย... แม่พวมแพง ฮือ...
กินแลงแล้ว... แม่กล่อมนอน เอย...
แม่กล่อมนอน ฮือ...เอย... ละนา
แล้วมาบัดนี้ฟ้าสีครามพวมไขตัวสมมุตินามไขความฮู้ คอยฟังดูอย่าใจม่อ
สิเป็นรองหรือเป็นต่อ อย่าฟ้าวไขห่อแป้งกระเป๋าแห้งบัดห่าเสีย อือ...
เริ่มยกหนึ่งกำลังออกสตาร์ตวิ่ง ลูกสูบแล่นบ่ทันหัน
ยังตามหลังบ่ทันแซงแข่งเขา เออ... บ่ทันได้
พิศมัย เพชรลมโชยกำลังมายืนร้องบนเวทีให้ไฟส่อง
บ่ทันฮอดเกียร์สอง สามยังมีสี่ห้า โอยลุงป้าท่าเบิ่งเอา...
ก่อนสิสมมุติเว้าเข้าในเรื่องบ่อนเรียงบท
พี่ขวัญชัย แสงยศ เพิ่นแบ่งปัน อือ... บ่ทันคล่อง
ตัวของพิสมัยน้องสมมุตินามเป็นนางไอ่
แฟนบ่ต้องสงสัยฟ้าสีครามนามชื่อนี้บุญมีอ้ายกะอยู่นำ เอย...
ลำปีก่อนกับปีนี้กะคือเก่าบ่ไปไส
พี่ขวัญชัยพี่บุญมีบ่เปลี่ยนแปลงให้วงฮ้าง
ซ่อยกันลำซ่อยกันสร้างบ่ปีนเกลียวให้พร้อยด่าง
ผู้เพิ่นจ้างฟ้าสีครามขอรับรองได้ทุกมื้อ ไปลำฮ้านบ่เปลี่ยนโต
ไหมนางลำแม่นสิรูปบ่โก้กายน้องก่ำคือกา
ชีวิตเป็นชาวนาก่ำกะตามแต่เพียงร่าง
ใจของนางยังคงที่เป็นคนมีอุดมการณ์บ่หลบปี้นหลบไป่
ลำแต่น้อยจนใหญ่อาศัยแฟนซ่อยย้อง อีหมัยน้อง...จั่งค่อยดัง เอย
ห่านี้ตกลงใจว่าสิมาอยู่ยั้งกับอ้ายพี่ขวัญชัย
ฟ้าสีครามบ่ไปไส พิสมัย...กะเคยเว้า
แล้วคันแม่นเซาวงนี้ สิวางมือทางร้องแอ่ว
ตัดสินใจนั้นคักแล้วจั่งมาเว้าสู่ฟัง เอย...
ขอขอบคุณพวกแฟน แฟน อีกครั้งที่มานั่งเป็นระดับ
จับนิทานผาแดงบ่อนสิไป เอย.. บ่มีช้า
อะหัง โตเฮียมข้าเป็นสาวมาชื่อนางไอ่
เมืองทีตานครใหญ่พญาขอมเป็นผู้เฝ้า
สิไปเว้า เอย พ่อก่อนนา อือ...
สิไปเว้า พ่อก่อนนา เอย อือ... หนอ โอยละนา
(เว้าผญา) ฉันมีนามกรเค้าโฉมเฉลาแก้วไอ่
พ่อแม่ตั้งแต่งให้ไผกะฮู้คู่สุคน
เป็นลูกสาวผู้ต้นของพ่อพญาขอม
เนานครทีตาใหญ่มาสิบเจ็ดย่าง
ทุกปีมาพ่อเคยทำสร้างเอาบุญบั้งไฟใหญ่
ส่งสาส์นไปบอกพี่น้องไกลใกล้ให้ด่วนมา
มื้อนี้กัลยาแก้วสิไปหาพระเจ้าพ่อ เบิ่งก่อนนา
ห่าเพิ่นมีเรื่องเว้าแต่ยามเช้าก่อนงาย
(ลำ) แล้วขยายกลอนวอนหาข้อหมอลำดังฟังกันง่าย
ขอขอบคุณแฟนทั้งหลายทั้งผู้เชียร์ผู้ย่องให้ดังก้อง...ทั่วอีสาน เอย
ฟ้าสีครามบ่เคยลืมดอกท่านพวกน้องพี่ผู้มีใจ
พิศมัย เพชรลมโชย ยังจ่มหาอยู่เด้ป้า
ขอประวันทาไหว้หากแฟน แฟน สนใจอีหมัยน้องบ่เลิกง่าย
หากแฟน แฟน ทั้งหลายยังซ่อยชูซ่อยย้อง สิลำร้องอีกต่อไป เอย...
ฝากแหน่เด้อ ฝากเสียงมารับใช้ อย่าฟ้าวหน่ายห่าคลายเหงา
เอาหมอลำคนจนไปกล่อมใจ... อย่าไลเว้น
ได้เห็นปลาอย่าลืมข้องลองฟังไปห่าได้เรื่อง
ฮอดเดือนยี่เดือนเจียงห่ามีงานแจกข้าว จั่งเอาน้องไปซ่อยลำ
บัดนี้พั้วดอกล้ำนางไอ่ใจถวิล
จักไปทูลพระบิดาพ่อพญาขอมเจ้า
เวลาสามโมงเช้าสิลงปรางค์ไปเว้าพ่อ
ละรอท่าฟังคันบ่อนหน้าสิมาเว้า แม่นสู่ฟัง อือ...
สิมาเว้า... แม่นสู่ฟัง เอย... อือ เอย โอยละนา