الحزن و الكبت - الحياة ما بقاش ليها طعم بث مباشر على التيك توك ٦ ٩ ٢٠٢٤ زغلول البطوطى

الحزن والكبت
من الحد للسبت
و البؤس و القهر
طول الشهر
و الدموع نهر
و الأوجاع بحر
و الألام مهر
و الأسى و الضنا
طول السنة
خلاص تعبت أنا
و نسيت الهنا
و القلب للأحزان انحنى
ما بقيتشى عارف مين أنا !!!
العذاب مصاحبنى
و الاكتئاب مش سايبنى
و الغم ضاربنى
و اتعودت على كده
حزنى غنى و شدا
و أبكى حتى القلوب القاسية
اللى هى لقسوتها ناسية !!
و برده ماشى فى طريقى
و الحزن ما زال صديقى
و كل ما أهرب منه
ييجى حزن أكبر منه
دايرة أحزان ما بتنتهيش
مش نافع معاها حتى التطنيش !!!
و لا حتى عارف أقفل عليها الشيش
يا ريت الحزن يسيبنى أعرف أعيش !!!
زغلول البطوطى
الحياة ما بقاش ليها طعم
لأن القلوب ما بقاش ليها دعم
أما الضحكة دى أكبر زعم
تمثيل و إتقان للدور فى الفيلم
و الفيلم اسمه ( الكوميديا السوداء )
بعد ما زاد و انتشر الداء
و زادوا و كتروا الأعداء
و غاب الطبيب و اتلغى الدواء
و اللى اتعشمنا فيهم طلعوا هواء
الحياة بفرحها و حزنها بقت سواء
و الأحزان و الأوجاع مالية الأجواء
عشان كده تم إنتاج فيلم( الكوميديا السوداء)
تتر البداية طلع من نوع فريد
عبارة عن مطلع أغنية لفريد
بتقول
عينيا بتضحك
و قلبى بيبكى
و ايه بس أخرة
بكايا و ضحكى
عينيا بتضحك
و قلبى بيبكى
بطل فيلم ( الكوميديا السوداء )
جرحه الروحى خلاه فى حالة إعياء
جرح كاد يوصله لمرحلة الانتهاء
بس هو بيحاول يداويه
بنفسه و بدموعه و بإيديه
العذاب ياما حط عليه
و هو مغلوب على أمره
و صابر على ألمه و مره
الحزن و الأسى مالى عمره
و مع ذلك بيتضاحك
و بيقول لنفسه
تضاحك
يمكن تجيلك أفراحك
حاول تنسى جراحك
بس فيه جراح ما بتتنسيش
عكرت صفو الحياة و عاملة تشويش
و مع ذلك بتطالبه بالبأشيش
و هو بيحاول يتعايش مش يعيش
و ساعات بيلاقى و ساعات ما بيلاقيش
أما تتر النهاية
يشبه تتر البداية
مقطع رهيب
للعندليب
بيقول
فى يوم فى شهر فى سنة
تهدى الجراح و تنام
و عمر جرحى أنا أطول من الأيام
وداع يا دنيا الهنا
وداع يا حب يا أحلام
ده عمر جرحى أنا أطول من الأيام
زغلول البطوطى