Рет қаралды 28,222
شوربة الحب البيضا على طريقة أمي الغالية
المقادير:
لحمة بعظم
كوب حب مجروش
ملعقة كمون حبات
ورقة شيبة
ملح
الطريقة:
في قدر ضغط نضيف اللحمة ونضيف عليها موية مغلية لين تبدأ تغلي ونشيل منها الريمة وبعد كدا نضيف الكمون والشيبة والحب المجروش ونقفل القدر لين يتستس بعد كدا نهدي النار على شمعه لمدة ساعتين
نفتح بعد كدا القدر ونقدمها مع الصوص عبارة عن خل أسود مخفف بموية نضيف عليه بقدونس ورشة ملح وفلفل أسود
وبالعافية وادعولي معاكم
سمبوسة البف المنفخة
المقادير:
٣ أكواب دقيق
١ بيضة
ملعقتين كبيرة زبدة
ملعقة كبيرة ملح
ملعقة كبيرة نشا
موية نضيفها بالتدريج
الحشوة:
ربع كيلو مفرومة
٤ حبات بيض مسلوق
١ بصلة مفرومة
بقدونس
ملح
فلفل أسود
كمون
الطريقة:
في العجانة نقلب المكونات الجافة أول شي وبعد كدا نضيف الزبدة والبيضة وشوية موية ونعجنها حتى يسير قوامها طري ومايلصق في اليد نغطيها ونتركها ترتاح لمدة ساعة بعد مرور ساعة نقسم العجينة قسمين ونفرد كل قسم بشكل دائري فرد خفيف وحاولو تمدوها بيدكم مد خفيف من الوسط إلى النهاية بحيث ماتكون العجينة سميكة وتكون خفيفة وماتنقطع وبعدها نطبقها على بعض ونحددها قسمين ونرص الحشوة على قسم واحد وبين كل حشوة وحشوة نبلل العجين على شكل مربعات ونقلب الطرف الثاني من العجين على طرف الحشوة ونضغط على كل حبة بف وبعدها نقطعها بقطاعة البف
بعد مانقطعها نرصها في صينية عليها منشفة نظيفة ونغطيها لوقت القلي ونقلي الكمية اللي نحتاجها بزيت حامي ونقلي القراميش الي هيا الأطراف الباقية من العجينة ونرش عليها بهارات البطاطس والدقة المديني
*ممكن تفردوا العجينة قطعة قطعة ( صغيرة) وتشكلوها بقالب السمبوسة وتقلوها
الحشوة:
نحط الطاوة على النار ونحط المفرومة وضروري أول شي نطقطقها لين تجف مويتها وبعدها نضيف البصل والبهارات لأن زفرة المفرومة ماراح تروح لو أضفنا البصل من البداية بعد ماتنشف المفرومة نضيف البصل والبهارات والملح ونقلبهم نطفي النار ونتركها تبرد بعد ماتبرد نضيف البقدونس والبيض المسلوق عشان لايتغير لون البقدونس
وبالعافية وادعولي معاكم