Лейля Батырова. Къардан адам ясаймыз. Лейля Батырованынъ сесинден.

Лейля Батырова
Бала оюны. Балалар тёгерекке тизилелер, юрелер, арекетлер япалар. Ортада бир бала (къар адамы) турып озь сёзлерни айта.
Къардан адам ясаймыз
Азбарда кезеджекмиз,
Сыранен тизиледжекмиз.
Келинъ, къарны топлайыкъ,
Къардан адам ясайыкъ!
Къопкъадан къалпакъ ясармыз,
Хавучтан бурун олсун.
Комюрден козьлер япармыз,
Бизлерде бирлик олсун.
Бакъынъ, насыл муджизе!
Къардеде, къошул бизге!
Истесенъ, бизнен ойна,
Я да бир тюркю йырла.
"Йымшакъ къардан ясалдым,
Юрмеге де огрендим.
Эм йырлайым, эм кулем,
Эм де сизнен шенъленем".
Ана шай! Ана шай!
Къардеде бизге ошай!
Leylâ Batırova
Bala oyunı. Balalar tögerekke tizileler, yüreler, areketler yapalar. Ortada bir bala (qar adamı) turıp öz sözlerni ayta.
Qardan adam yasaymız
Azbarda kezecekmiz,
Sıranen tizilecekmiz.
Keliñ, qarnı toplayıq,
Qardan adam yasayıq!
Qopqadan qalpaq yasarmız,
Havuçtan burun olsun.
Kömürden közler yaparmız,
Bizlerde birlik olsun.
Baqıñ, nasıl mücize!
Qardede, qoşul bizge!
İsteseñ, biznen oyna,
Ya da bir türkü yırla.
"Yımşaq qardan yasaldım,
Yürmege de ögrendim.
Em yırlayım, em külem,
Em de siznen şeñlenem".
Ana şay! Ana şay!
Qardede bizge oşay!