Рет қаралды 9,995
الانتساب إلى هذه القناة للاستفادة من المزايا:
/ @user-id-kawthers-sanad
حجز الاستشارات : kawtharsanad.com/
رقم واتساب ٠٠٢٠١١٥٠٥٨٦٠٥٢
هو النرجسي عايز ايه مني بالظبط
انا بقيت متلخبطة ومش فاهمة هو النرجسي عايز مني ايه بالظبط ؟ هو أصلا ليه اتجوزني وعايزني أكون ازاي وعايز يوصل معايا لإيه ولما هو كارهني اتجوزني ليه ؟
النرجسي زي ماقلنا قبل كدة عنده مشاكل من الطفولة وقفت نموه النفسي هناك فعنده شوية حاجات كدة مسيطرة عليه نفسيا ، منها انه مش حاسس ان له قيمة ودايما خايف من الرفض وخايف لو اتقبل يتهجر وعشان يخلص من الشعور دة بيحاول بمجهود خرافي انه يلبس القناع اللي هو يظهر في احسن صورة يبان مسئول قوي مهتم محب ناجح وسيم طيب وحبوب ، وبعدين لما تعجبه واحدة زي الطفل اللي بتعجبه لعبة يفضل يزن لحد ماياخدها ويتخانق ويروح ويرجع ويصمم ياخدها زي مابنشوف بعض الحالات تقول فضل يتقدم لي ٨ سنين لحد ما اهلي زهقوا ووافقوا عليه واللي ست سنين واللي اربع سنين ، ليه وايه اللي بيخليه يصبر كل السنين دي وهو مش بيحبها ولا بيعرف يحب ؟ لا هو مش صابر ولا حاجة هو بيدور على غيرها ويجرب فيلاقي انها لسة احسن من اللي عرفها فيرجع يحاول تاني ويترفض فيرجع يشوف غيرها وبرضه يفضل شايف اللي رفضته احسن وفي نفس الوقت هي بتمثل له تحدي ازاي ترفضه فلازم يثبت لها ولاهلها اللي رافضينه انه احسن منهم كلهم فيرجع تاني يتقدم وهكذا لحد مايتوافق عليه وطبعا بيكون فرحان اد ايه بالنصر انه أهلها عرفوا انه كويس وانهم كانوا غلطانين لما رفضوه ورجعوا في كلامهم وقبلوه وفرحته بالانتصار دة بتدخله في بداية العلاقة بقوة واندفاع الطفل اللي فرحان باللعبة اللي كان حيموت عليها بس ايه اول مايفتح العلبة اللي فيها اللعبة ويلعب بيها ساعتين حيزهق ويرميها وقدمت ويدور على لعبة غيرها ،المهم ان اندفاعه وفرحته انه اتقبل بيعبر عنها بمرحلة اللافبمبينج لزوجته دي وبعدها كلكم عارفين ايه اللي بيحصل ،
المهم هو عايز ايه منك ؟ هو ليه بيتجوز أصلا دي قلناها كتير هو عايز كل حاجة في الحياة هو عايز يكون عنده كل حاجة وعايز يكون صح ادام الناس في كل حاجة وطبيعي انه يكون عنده بيت وزوجة وأطفال عشان الصورة تكمل ، اه هو بيتجوز عشان هو بني ادم ولازم يتجوز لكن عايز منك ايه ؟
هو عايز يحس بالأمان وعايز يحس بان له قيمة وعايز يحس انه مركز اهتمام العالم وعايز ياخد كل حاجة عينه تقع عليها لانه لسة طفل نفسيا ، مش الطفل طول ماهو ماشي في الشارع يقول لك عايز دة وعايز دة وتشتري له يمشي شوية ويشوف حاجة تانية يطلبها ومش بيشبع لان طبيعة الطفل الغير مدرك بيتخيل ان هذا العالم المحيط به ملك له كل ماتقع عليه عينه فهو خاص بيه بتاعه ومن حقه يحصل عليه ،طفل ومش فاهم حاجة ، ولما يطلب كتير وتقولي لا كدة كفاية يغضب كما لو كنتي بتمنعي عنه حقه ، صح؟ دة الطفل الطبيعي اللي لسة لا وعي ولا ادراك ، وهو دة حال النرجسي ، عادة بنقول اتكلمي مع طفلك وفهميه ان فيه حدود وان امكاناتنا محدودة ومش كل اللي نشوفه نقدر ناخده وان فيه ملكية للاخرين ماينفعش نتعداها عشان تعلميه وتربيه صح من غير زعيق ولا عصبية ، دة للطفل طيب والنرجسي دة بقى حنعمل فيه ايه؟ حنقعد نربيه هو كمان؟
كمان النرجسي متشبع من البيئة الذكورية اللي كونته ان هو المسيطر والراجل هو اللي كلمته تمشي والرجل هو الأعظم وانه اعلى من الانثى واهم واقوى وهي لازم ترضخ له ولازم تسمع كلامه ولازم تتحبس في بيته ولازم تخدمه وتستحمل إساءة ادبه عشان هو سيدها وهو ربها فكمان عايز يكون رئيس جمهورية بيته وطبعا محدش يعترض ولا حد يتمرد ولا حد يقدر يعامله بندية ولا حد يقدر يقول رأيه ولا حد يغلطه ولا أي كلام من دة ،
كل الكلام دة بيختلف من نرجسي لاخر ومن عمر لاخر يعني مش كل الكلام موجود في كل النرجسيين فيه نرجسي مش مسيطر ومش عايز يحبس زوجته بالعكس عايزها تنزل تشتغل وتجيب له فلوس او سايبها تخرج وتعيش حياتها وتشتغل وتودي الأولاد وتجيبهم عشان هو مش فاضي لها أصلا ولا فاضي لاولادها ومش عايزها تقول له انت فين مش عايز حد يشغله عن نفسه وشغله ونزواته ودة كمان ممكن يكون كريم جدا معاها ومع أولاده لكن هو كزوج مش موجود هو ايه تي ام وراضي انه يكون ايه تي ام ولو هي اعترضت هنا بتشوف الوجه الاخر ، فكل نرجسي وظروفه ومتطلباته وعقدة الطفولة اللي عنهد
في النهاية انتي ماتسأليش النرجسي عايز منك ايه لان هو مش مهم المهم انتي عايزة ايه انتي عايزة منك ايه وعايزة من الحياة دي ايه وهدفك ايه انتي عايزة تعملي ايه ، النرجسي عايز ياخد منك كل حاجة كل حاجة حتى روحك لو طال حياخدها شخصيتك بينسخها وياخدها وتبقى شخصيته بيتعلم منك كل حاجة طريقة التفكير واللبس والاكل وحتى الحنية والتعامل الطيب مع الناس بيقلدك فيه ويدعيه لنفسه والناس بتصدقه ، طيب انتي استفدتي ايه لما عرفتي هو عايز ايه؟ ولا حاجة كونك عرفتي هو عايز ايه مش حيغير الوضع ، عشان كدة بقول لك انتي لازم تعرفي انتي عايزة ايه ولما تعرفي انتي عايزة ايه حتستفيدي من معرفتك بنفسية النرجسي وطباعه واضطرابه حتستفيدي انك تقدري تقرري ينفع تستتمري وتتعاملي ولا لا وانك لو قررتي تستمري معاه حتتعاملي معاه ازاي بناء على عقدة الطفل اللي عنده وبناء على نفسيته وشخصيته واضطرابه وعشان نوصل لدة لازم الأول تعرفي انتي عايزة ايه انتي ايه خطتك في الحياة انتي ايه هدفك انتي عايشة ليه وناوية تعملي ايه انتي فين من خلافة ربنا في الأرض انتيب تفيدي اللي حواليكي بايه وازاي تقدري تفيديهم ولا انتي هدفك بيشبه هدف النرجسي حاكل واشرب وانام والبي احتياجاتي واكون محصور في حياتي ونفسي ، اعرفي نفسك عشان تعرفي انتي عايزة ايه وتبطلي تفكري النرجسي عايز ايه
#صحةـنفسية #القوة #الاكتئاب #النرجسي #النرجسية