ليه النرجسي بيقلب عليكي لما تكون امه واخته موجودين او قريبين منه؟

ليه النرجسي بيقلب عليكي في وجود امه واخته ؟
حالات كتير بتقول ان النرجسي طول ماهو بعيد عن اهله كويس معاها وأول مايكون معاهم بيقلب عليها ويطنشها ويعاملها معاملة سيئة وكمان بيتعمد أصلا انه يبين لهم انه مش مهتم بيها ولا كأنه أصلا يعرفها وخصوصا لو في تجمع عائلي او مناسبة عامة . والاسوأ بقى ان بعض الحالات بتقول ان لما بيتخاصم او بيبعد عن اهله بيكون معاملته معاها في حياتهم شبه طبيعية وبيكون هادي وتحت السيطرة اما لو هم اتصاحبوا عليه ورضيوا عنه فبيعاملها معاملة الخدامين وبيهملها وبيهمل أولادها ،طيب ليه النرجسي بيعمل كدة ؟
احنا اتفقنا قبل كدة ان النرجسي لما بيكون الطفل الدهبي في عيلته بيفضل كدة عندهم للابد فلما بيرضوا عنه بيكونوا المصدر الرئيسي للوقود وبيكونوا اهم منك كمصادر للوقود لانهم اقوى منك طبعا انتي تحت ايده وخايفة وخاضعة ومش مهم رضاك يلانك مادربتيهوش على انه يحاول يحصل على رضاكي زي ما امه واخته وممكن ابوه كمان مدربينه أيا كان مين فيهم نرجسي او كلهم ، كمان احنا قلنا قبل كدة ان النرجسي بيميل اكتر للشخصيات اللي تهمله وترفضه وماتديهوش اهتمام يجري وراهم ليه؟ عشان يحصل على اهتمامهم ويثبت لهم ولنفسه انه يستحق الاهتمام وانهم هم اللي مكانوش فاهمينه وان العيب فيهم انهم ماقدروش يعرفوا قيمته وأول مايحس انهم اتعلقوا بيه بيبدأ بقى ينتقم طبعا منهم لانهم عاملوه وحش في الأول ، ايه دة امال ليه مش بيعمل كدة مع اهله ؟ لان اهله عمرهم مابيحسسوه انهم راضيين عنه ومتعلقين بيه هم بيعاملوه بأسلوب فتات الخبز بس فهو يفضل طول الوقت مستني رضاهم وأول مايرضوا يرميكي ويجري ياخد منهم جرعة وقود إيجابي عالية جدا ولما يقلبوا عليه يرجع لك . طيب ايه الحل في الحالة دي ؟
الحل الوحيد انك تعملي زيهم اذا انتي مجبرة تكملي معاه لازم تلاعبيه بنفس طريقتهم ، وطبعا مش محتاجة افكرك مش حتقدري تعملي دة غير لو تشافيتي ،لانك أصلا لو مش مكملة التشافي حتلاقي نفسك بتتألمي من الحكاية دي ومنكدة عليكي حياتك كلها وقطعا حتغيري من امه ومن اخته لان كلسة مدمناه ومتخيلة انك بتحبيه ، عشان كدة انتي الأول لازم تتعالجي من الإدمان وبعدين لوحدك حتلاقي نفسك مش هامك ارتباطه بأهله بالعكس وجوده معاهم بيكون اريح لك لانه بيكتفي بالوقود منهم وبيبعد عنك ويريحك شوية ، طيب بعض الحالات بتقول انه لما اهله بيرضوا عنه بتكون النتيجة مشاكل كتير لانهم بيقلبوه عليها وكمان ممكن يمنع المصاريف وممكن يروح عندهم بالشهر ويرميها هي وأولادها ، الحالات دي عايزة أقول لها المشكلة مش في اهله ،النرجسي اللي من النوع دة بيكون أصلا عايز يهرب من المسئوليه ولو مكنش اهله حيدور على أي مكان يروح فيه او أي واحدة كبديل للوقود ، الفكرة مش في ان اهله بيقلبوه الفكرة ان هو أصلا عايز يتقلب واللي زي دة لو ملقاش الكلام دة عند اهله حيدور عند واحدة تانية ولو ماعرفش حيكون أصحابه وشلته هم اللي بيقوموا بالدور دة ، النوع دة حيهمل وحيبعد كدة كدة وهو أصلا عايز حد يقول له اللي انت بتعمله صح زوجتك هي اللي غلط ووحشة عشان يهدي الشعور بالعار اللي عنده . طيب دلوقتي المشكلة فين ؟ المشكلة لا في النرجسي ولا في اهله ولا في الثانية سواء زوجة تانية ولا واحدة بيمشي معاها ، المهم المشكلة مش في كل دول المشكلة فيكي انتي ،انتي لما اصبحتي مدركة انك مع نرجسي لازم تفهمي انه هو سيء وهو أصلا مفيش فيه امل والمفروض انك ابدا ماتدوريش عن السبب في المشاكل اللي هو بيعملها ومين وراها لانهحيعمل المشاكل كدة كدة وانتي مفروض ماتشغليش بالك باللي بيسبب المشاكل دي انتي مفروض تشغلي بالك بانتي حتتعاملي ازاي مع المشاكل نفسها وحتحليها ازاي بعيدا عن النرجسي لان النرجسي مفيش حاجة حتغير فيه ،انتي لازم تعرفي تؤمني نفسك عشان لما يسيبك ويروح لاهله ومايسيبش لكي فلوس تبقي مش محتاجة له لازم تتصرفي يا اما تحوشي من المصروف او انك تدوري على شغل وزي ماقلت لك لو تشافيتي مش حيهمك عدم وجوده غير عشان المصاريف ودي حلها في ايدك انتي وبس ، اتعبي واتعلمي أي حاجة تدخل لك رزق وصدقيني ربنا اللي بيرزق مش النرجسي

[@godislove4995]

انا مش مصدقه انك اطرقتى للموضوع ده انا دائما كنت بحس بكده. واحساسى طلع حقيقي فعلا هو كان بيتعمد يهينى ويعاملنى وحش قدامهم

[@alaa89khaled16]

حقيقي اوي فعلا والله اكنها عايشة معانا ربنا يباركلها

[@NadaN-b9m]

وانا

[@marwaelsherif9930]

قلت كده والله من سنييين محدش صدقني ... والله حضرتك تستحقي جايزه نوبل. ماشاء الله عليكي.

[@mayasoultana9587]

ياارب لاتحملنا ما لاطاقة لنا به اللهم ان الالم والكسر وصل للعظم.. اللهم ارفعه بابسط رحمتك عااااجلا وليس اجلااا

[@استغفرالله-س9و8ث]

امين يارب العالمين جميعا يارب

[@نعوميبهجت]

اللهم أمين يارب العالمين

[@yarablotfak]

فعلا حسيت انه بيعمل راجل عليا قدامهم وكمان بيغيظ فيهم بيا عشان يخلق عداوة بينا عشان يعرف اخباري منهم لو خبيت منه حاجة اكتشفت ده متاخر وفعلا خلق الكره بينا

[@حياةالقلوب-ش4ب]

يعني لما تيجي الحلقة متوافقة مع الظروف الي بنمر فيها بالتفصيل الممل اكيييد مش صدفة اكيد هي رسايل من الله ليعينا على تجاوز مانمر فيه اشكرك يا غالية وربنا يجزاكي عنا خير الجزاء

[@oppooppo-kr3cq]

فعلا والله يا حبيبتي صدقتي هي دي الظروف ايلي بنمر بيها بكل تفصيلة فيها سبحان الله

[@maryemalabdullah8794]

والله العظيم أنا صارلي شهر جايبلي أمه وأخته عندنا بحجة إن أمه مريضة وأخته تهتم بيها بس أنا معامله فتات الخبز هو يطلب رضائي وأنا الحمدلله اتشافيت وأنتظر خبر الوظيفة يارب اتوظف وارتاح

[@حياةالقلوب-ش4ب]

@@maryemalabdullah8794 يارب يرزقك من اوسع الأبواب ويعينك عليهم

[@maryemalabdullah8794]

@@حياةالقلوب-ش4ب الله يسمع منك تسلمي حبيبتي

[@sinsiss]

اكيد هي رسائل من الله سبحانه وتعالى

[@amanyali2872]

عاوزين حلقه ع الأطفال النرجسيين خصوصا لو وراثه من الاب وازاي نتعامل معااهم

[@Sabrina-vq8rj]

الدكتورة قالت مفيش طفل نرجسي إرجعو الفيديوهات القديمة وستجدون الرد على سؤالكم

[@yarablotfak]

حلقة ازاي تحمي اطفالك من انهم يتحولوا لنرجسيين kzbin.info/www/bejne/qGa7gJSqgsaXgpo

[@angeparadie5880]

صحيح محتاجينها جدا

[@زيادمسعد-و2ه]

فعلآ السؤال ده مهم جدآ

[@yarablotfak]

@@زيادمسعد-و2ه الحلقة موجودة بعنوان ازاي تحمي اطفالك من انهم يتحولوا لنرجسيين

[@duaasaif4521]

حسبي الله ونعم الوكيل فيه وفي امه اعوذ بالله منهم عصابة في مستشفى المجانين !!وانا عايشة معاهم الله ينتقم منهم

[@سبحانالله-ر7خ5و]

لا هم شياطين بشريه اعوذ بالله منهم

[@NadaN-b9m]

هما حيمرضوكي والله انا امرضوني

[@abdomagdy1744]

للاسف انا عرفتك متاخر والان بعد عمر ٣٠ سنه خسرت فيها صحتى وحالة كله فهمت الوضع وبحاول عشان احافظ على الجذء الياقى من صحتى وربنا معايا وشكرا ليكى وصدقينى انت داعم كبير ليا

[@noorhassan7741]

كلام صح جدا جدا عامل راجل علي زوجته وأولاده ومع أمه واخته يقلب قطه فظيييع ربنا ينتقم منه ومن اهله

[@galaagalaasaad3876]

حسبي الله ونعم الوكيل في كل رجل ظالم

[@حسبيالله-خ9ق]

يااااا الله يا ناس كيف ربنا عارف والله اجا عالوجع وبوقتووووووو كمااان هاد تماما الي بيصير معي حتى هو حيطلقني عشان يكسب الرضاااااا وانا شلحتو من رجلي وكبيتلهم وحاخدلهم فلوسه الي كان بيمنعها عني وبيحرمني من المصروف ادعولي الله يقويني ويثبتني ويشافيني لاني حاسه بقرفة منو

[@نورالهدي-ض2ذ6د]

فعلا كان شئ ملاحظ جدا أنه بيقلب في وجودهم وكمان بيقومهم عليكي من غير اي سبب

[@user-cd5ys7bv7u]

فعلاَ كلامك في القمه... وقعت في مشاكل مع امه واخته واخو لسنوات تهم اخلاقيه وسحر وتدخلات وكان دائماَ يبحثون اله عن زوجه ثانيه.... وفي النهايه وبسبب متابعه الفديوات لحضرتك ولبقيه الدكاترا والاستشارين ادركت ان هو كان السبب خلف كل العدائات والمشاكل.... من اجل نزواته وزواجه الثاني وبعد الزواج ٥ اشهر رجع عليه يريد يدخل البيت ويعيش معانا مره ثانيه لكن الحمد لله اتخذت القرار الصح تركت البيت وستأجرت بيت ثاني اني واطفالي فقط واقمت عليه دعوه قانونيه واخذت النفقه وتركته بدون رجعه انشالله وهو حالياَ مع زوجته الثانيه وامه واخته واخو يعيشون لحضات الانتصار.... ولكن الله يمهل ولايهمل ونعم بالله لان هذا قانون الهي غير قابل للتحريف او التبديل وظلم الناس ضريبه يدفعه الظالم اما في الدنيا او في الاخره استمري ياااا احلى كوثر في الدنيا اختك من العراق

[@basantshoip2576]

حبيبتي ربنا ينتقم منهم

[@AnaSu-s7c]

انتصار مؤقت انما انتي اللي فوزك ساحق أن شاء الله انقذتي نفسك وأولادك وده يكفي اوي

[@tasnemhessin6104]

مبروك ونعم بالله. هو ال بيخلص الحقوق. القانون الالهى الاقوى الحمد لله

[@سبحانالله-ر7خ5و]

والله نفس حالتي لكن لم اتطلق الي الآن

[@rahik75]

kzbin.info/www/bejne/qajIqJt-bJ6cpck

[@imenben7901]

كنت فيييييين من زمان سبعة وعشرين سنة في هذا المشكل ماشاء الله عليك يا دكتورة

[@jasimineflowers7718]

الله ينتقم من حماتي وبنتها العانس😡 هما اللي يشجعو زوجي النرجسي على اهانتي وضربي ربي ينتقم منهم دنيا وآخرة🙏🙏🙏🙏🙏🙏🙏🙏

[@emmy1452]

عايز يعمل فيها راجل وانه مسيطر على اساس انه كويس معايا وهما مش موجودين ده غير التثليث بينهم وبيني مرة بيغيظني بيهم ومرة بيغيظهم بيا

[@NM-wu8gh]

موضوعات جامده ومن قلب الحدث ماذا اقول يا د. كوثر عامله حلقه عظمه ماذا اقول بتصيبى الهدف يا دكتوره🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩🤩

[@rehabbadr3866]

فعلا والله ماشاء الله عليها

[@howidahelmy3198]

اللهم ما يا منتقم ياجبار اللهم ما انتقم لي منه أشد انتقام

[@samahhussin1018]

حبيبتي صح والله كأنك عايشه معنا تسلمي حلقة روعه ماشاءالله عليك حسبنا الله ونعم الوكيل

[@شروقالشمس-ل8ظ]

ياه يا استاذة كوثر...دة كلامك قمة في الروعة..والأجمل انك تعطي الحل للمشكلة..ربنا يزيد توفيقك ويسعد قلبك 🌷🌷🌷

[@howidahelmy3198]

الغلط من الاول اننا نرضى بالغلط

[@سبحانالله-ر7خ5و]

صح حنا قبلنا على انفسنا الغلط لكن الحمد لله اننا فهمنا صح متأخر لكن يارب نتعافي من التعلق المرضي وونتخلص منهم

[@maryemalabdullah8794]

سبحان الله وكأن الحلقة تتكلم عني الله يعطيك الصحة والعافية دكتورتنا المتألقة

[@نسيمالصباح-و2ج]

شكرا اللك استاذة كوثر الله ياخد النرجسي اخدت عزيز مقتدر

[@شروقالشمس-ل8ظ]

لك كل الشكر والامتنان. يا استاذة كوثر. كل ما تعلمناه يعود الفظل لله ثم لك يارب يجعل كل تعبك في ميزان حسناتك أن شآء آلله تعالى 🌷❤🌷

[@asmaaothman5029]

كان طول ما هو مسافر لشغله بعيد عن أهله كان كويس معايا واول ما سافر ورجع لأهله قالي مش عايزك 😂

[@bouchranouba5209]

دعاء لمن تشافت من إدمان النرجسي،اللهم ارزقه مايشغله عنا

[@moimoi2754]

فعلا فعلا لما كانت أخته تيجي لبيتهم بيعملي صمت و إهمال إلى أن تذهب إلى بيت زوجها...الله يرضى عليك

[@omimaelsayed4551]

مجرد معرفه القنوات الصادقه والواعيه مثل قناتنا هذه هو لطف من الله بنا ربنا يعزك يا استاذه واستمري في الوعي احنا فعلا مستفدين وبنطبق كل حاجه واكتر قناه واقعيه وبتحكي تفاصيل خطيره العناوين لوحدها حل الغاز لنا بفضل الله .واللهم صل وسلم وزد وبارك على سيدنا وحبيبنا ونبينا وشفيعنا محمد وعلى آله وصحبه وسلم تسليما كثيرا طيبا مباركا فيه ملء السموات والارض وما بينهما.

[@شروقالشمس-ل8ظ]

سبحان الله..كنت دائما أسأل نفس هذا السؤال..والحمد لله وجدت حضرتك منزلة هذا الفديوا..اشكر حضرتك كثير

[@ad9755]

لانه شخص لئيم الطبع دسبس النفس بليد الاحساس والمشاعر وعقول فارغة وقلوب ميتة حسبنا الله ونعم الوكيل نعم المولى ونعم النصير 💔

[@omimaelsayed4551]

ماشاءالله ولا قوه الا بالله وبعد ٣٠ عام او اكتر اكتشقت ان الخفي الحقير العشره انه هو سبب كل مشكله وكل عزله لي ولولادي سواء من اهله او اهلي ولكن الايام تدور وانا وولادي بفضل الله فاهمين ونبعد عنه نفسيا ونحن في بيت واحد ويارب نكون انا وهما في بيت لوحدنا قريبا يارب

[@dinahafez7983]

ربنا يرزقك ويريح بالك

[@Laila-rp6sb]

نفففففففس قصتي بالضببببط انا ست وعشرين سنه ولما اكتشفناه انا واولادي صار مثل الارنب في البيت ولا نفس معانا واسترجعن روحنا وقاطعناه نفسيا في نفس البيت

[@omimaelsayed4551]

@@dinahafez7983 ربنا يكرمك اختي دعواتك

[@omimaelsayed4551]

@@Laila-rp6sb ربنا يصبرنا ويعوضنا خير ان شاءالله في ولادنا

[@aidashadad7686]

حسبي الله ونعم الوكيل فعلا فعلا فعلا حسبي الله ونعم الوكيل

[@emanhamed1406]

بالظبط فعلا اول ما يقرب من اهله المواضيع بتتقلب

[@امسما-ع8ك]

ممكن تعطوني نصايح وتساعدوني😢 ام زوجي النرجسي الخفي الذي يخاف من امه.. جايه تعيش عندي زياره مطوله ويمكن ابنها يمنعها تسافر وترجع كيف اتعامل معاها امه نرجسيه شرسه انا ماعشت معاها كثير مالحقت اكون اسلوب للتصرف معاها وماكنت عارفه وقتها انهم عايله نرجسيه.. انا ماشفتها من خمس سنين.. ارجوكم انصحوني

[@زهرهالربيع-ظ7ك]

لما بيجمعوا بيروح ياكل عندهم كمان فعلا كل كلمه حق

[@azzaemad9690]

صح الكلام الرزق فى ايد ربنا ولازم نتعب شويه عشان نعمل دخل يمشي الدنيا من غير ما نعتمد ع هذا الشئ......تحياتى لك يا احلى كوكى فى الدنيا🌹

[@hanaagaber9267]

اللهم صل وسلم وبارك على نبينا محمد وعلى اله وصحبه وسلم تسليما كثيرا عدد خلقك ورضا نفسك وزنة عرشك ومداد كلماتك

[@rofidamakser2894]

دكتور ممكن حلقه للأطفال الي عندهم اعراض النرجسبه

[@Laila-rp6sb]

لا يا اختي الاطفال طبيعي عندهم نرجسيه بسبب العمر الصغير فلا يحاسبوا ولكن نفهمهم بهدوووووء

[@-tee-tee]

حتى الأم النرجسية تعمل كدا قدام اهلها لدرجة اصبحو يعملوني زيها وحش

[@nouhanina5112]

ولي يكون العكس معاملة زفت معاك في البيت استفزاز وتجاهل وقدام أهله الرومنسية والحنان والاهتمام وأنه احنا الكووبل المثالي لي ناس تحسدنا وبس نرجع البيت ينقلب شو تفسييير؟

[@EM-hg2gy]

ايوة انا زيك

[@جنةلتعليمالخياطة]

منافق

[@أحلامالماضي-ج4ق]

أنا زيك منهم لله والله العظيم

[@hajaralmasri1603]

بيغيظ أهله

[@dinahafez7983]

نرجسي خفي حبيبتي

[@hdhsdjdj2913]

أحسنتي فعلا النرجسي هيج تصرفاتة واني محتارة العمر كله ليش يقلب علية من يشوف احد من اهلة يسوي نفسة مسيطر ويصيح ويغلط ويحتار شيسوي

[@mahaalbetar3572]

كلام حضرتك واقعي جدا استفدت من فيديوهاتك الرائعة استمري ودائما من نجاح الى نجاح اشكرك جدا جزاك الله كل خير وادامك نعمة في حياتي وحياة احبابك

[@abeer27985]

فعلا والله كذا دائما وحتى اذا كنا بمكان عام يعني قدام الناس

[@ntalynanosaly3843]

اي والله مفيش امل منو في حاجة اي صح يخترع ايا شي عشان يستفزك حسبي الله ونعم الوكيل

[@MN-gr8qq]

فعلاً أهله عمرهم ماكانوا راضين عنه لحتى الان

[@azharmohammed3878]

والله العظيم زيك لحد الان اولادي كبروا مشاءالله وصارو شباب بعدهم وراي اني ماهتم الهم عمرهم محبوني الى قير وباءس المصير المهم اني اولادي الله يحفظهم مرتاحين بس ميسيبناش بحالنه يفتشو ورانا يريدون يعرفوا كل حاجه عليه وعلى الاولاد الله ينتقم من امه العجوز الشمطاء وخوات واخوته الاستغلاليين اشوف بيهم يوم واحد واحد بكو غراضي كلها

[@MN-gr8qq]

@@azharmohammed3878 ربي يعوضك في اولادك خير

[@MihiKarima]

لو كان فيه حكم من الاول، من قبل الامن، ما كانش كاين كل ده، المجرمين.

[@alaael9416]

فعلا انا دايما حاسه انو لو امه وابوه مش معانا في البيت كانت حياتنا احسن المشكله انو وحيد ومافيش حل اخر امه اعتماديه تغذي نرجسيته وتشتغل عكسي يعني حتى لو حاولت الاصلاح وامه موجوده ماينفعش لانها اعتماديه وابوه نرجسي قاسي عليه وهو صغير بس اللن عادي يعني وانا واولادي الضحيه في المسرح السييء هذا كرهت حياتي منهم والحمدلله على كل حال

[@ggjanatgames6170]

تماما اللي عشته معاه

[@yahia4239]

يااااا الله سؤال كان محيرنى من كام شهر جزاكِ الله خيراً يا دكتور

[@emanuae5194]

لا ونا سألته قلتله ليش تعاملني كذا قدام اهلك ؟!

[@doharose5695]

قتلتيني بالضحك. ههههه. انا نفس حالتك

[@norghenam3832]

يا شامخة شموخ العظماء.....احبك

[@user-vv2dhala2m]

والله يااستاذه كوثر انا فهمت انه مفيش امل في تغييره وعملت القناه دي علشان يبقي معايه قرش واقدر اعتمد علي نفسي ونفسي اخواتي وحبايبي يساعدوني ارزق من القناه ومحتاجش ليه ولا لزله ليا انا واولادي

[@noralseba4177]

لو الأخ هو اللي بيعمل كدة !!ومراتو نرجسية برضو ومش مقصرة ..بترمي أي حاجة علية !! ..حسبنا الله ونعم الوكيل...يبقى أعمل حدود قوية ...والتعامل سطحي؟؟

[@chirazadchirazad1545]

تصورو انه اذني في ولادتي واهتم باخته مانها هي من انجبت وعيرني بكلام جارح جدا لكي يصفى له الجو معها المهم عذبني بشدة لن اسامح الى يوم الدين

[@emanuae5194]

فعلا يحطها في اهله ويفرقنا عن بعض 🤣

[@emabill4181]

فيديو رائع كالعادة شكرا استاذه كوثر ربي يحفظكم و يسعدكم 🙏🙏🙏

[@funnylife2943]

بتعرفي انا ممكن يكون معايا لفترة كويس بس يشوفهم بيقلب علي و يهيني بس الحمد لله ربنا اكرمني بعيلته هما عارفينه كويس و عارفيني دايما بيوقفو معايا الله يحميهم و يحفظهم و يرحم حماتي توفت كرونا

[@umdana8507]

واللهي انا بالضبططططططط عن الي بتتكلمي عنها بالفيديوووو وهو بالضببببببط كده معاي في حضرة امه واخته الحمدلله ربي لك الحمد وصلت معاه هاي المرحله اني تامه معاه عشان المصروف ويالسه احوش مصروفي ليوم الألبه السوده ويارب يارب يارررررب اتوظف دعواتكم الله يفتحها علينا جميعا يافتاااااح 🤲🏻

[@hajaralmasri1603]

لو رجل ؛ بيبين يعني قال كده راجل وساكن بيته😂 بس ولو لميته وخلاص بقيت قويه والبركة في دروسك ❤🎉😊

[@banazhassan481]

شكرا علي كل نصيح مهمة ياامناعضيمة ارجو حلقة اخرة في نفس موضوع

[@enasali1139]

حسبنا الله ونعم الوكيل فيهم كلهم دمروني انا وولادي

[@ديلذزععع]

ارجوكي ساعديني هو اخذ اولادي الكبار ودمرهم وسواهم نسخة منه اعمل ايه ارجوكي اني مااعرف اتصرف

[@fatenhassan4382]

انتى قلتى الأم والاخت هههههه نسيتى الأخ ودة هو اللى بيوجهة للأسف يعمل أية وما يعملش،اية لان الأخ الاصفر نرجسى ومسيطر ومشعوذ

[@روانحازمروانحازم]

فعلا كان بيحرجني قدامهم جامد وانا اللي مكنتش فاهمه

[@fadumofilsan3251]

وعليكم السلام ورحمة الله وبركاته اهلا وسهلا استاذة كوثر سند الله يحفظك🌹❤

[@sahreed1867]

والله اخويا بيقلب علينا لما تبقى مراته العقربة موجودة

[@almarabia4253]

😂😂👍

[@duhaa.abdullah1562]

بالضبط !!

[@ماريةمارية-ث8ض]

استاذة كوثر ازاي نتعامل مع النرجيسي لي يهددك بالزواج بامرأة اخرى

[@نسمهفجر-ف6خ]

بعد اذن الدكتوره..ماتزعليش مني اقولك ازاي تتعاملي عن تجربه طول ما انتي مبينالو أنك لو اتجوز عليكي حتموتي تبقي ضيعتي كل حاجه ولا تهتمي خليه يتنيل يتجوز دا إذا عملها وان عملها والله تبقي استريحني منو والي عملو فيكي حيعملو فيها دول مرض ومرض معدي

[@dinahafez7983]

قولي له ألف مبروك مع السلامة والقلب داعي لك متنساش تعزمني على الفرح

[@زهرهالربيع-ظ7ك]

اعطينا افكار للشغل ع الموبايل اصل انا بشتغل مع اطفال ومطلعين عيني

[@asmaahabib1855]

بجد ربنا يحفظك في الافاده ❤

[@dinaeltony7178]

طب دكتوره كوثر لما باجي اشتغل بياخد فلوسي أو يقلي مفيش شغل اعمل ايه في الحاله هل اشتغل من وراه

[@narimanmokhtar2583]

ايه طريقة الاستشارة مع دكتورة ؟؟ الله يرضى عليكو بسرعة انا في مشكلة كبيرة و زوجي النرجسي هيغدر بيا كمان ٣ اسابيع

[@omimaelsayed4551]

والرد جاني علي سؤال كان محيرني النرجسي الخفي معايا حطني انا واسرتي كلها في جيبه ولكن سرعان ما دبت الكراهيه وقله الثقه فيه من الكل وبفضل اعماله ومواقفه الشاذه اللي لما جمعناها عرفناه بس بعد عذاب الحلقه فسرت لي شئ انه لا يسعي لرضاي ولا لرضا اهلي رغم احتياجه لنا ماديا ونفسيا هو كالصخره معنا وكلنا اصحاب فضل عليه كذلك اخواته اصحاب فضل عليه ولكنه غير مخلص مع اي احد لا يراضينا ابدا ولا يصالح احد ابدا يفجر في خصامه مزيف في كل شئ والده هو اللي شفته كان ناجح وكان لايحبه ولا يساعده ولقيت ان شعور متبادل ولكن من الحلقات فهمت ان لازم يكون عاش طفوله صعبه فعلا هم كانوا فقراء واغتنوا بعد ذلك واصحاب مراكز مل عيلته ما عدا هو معقد فقير نرجسي خفي مطبق االاختبار كله لا وجود للمشاعر حتي العاديه مرات عديده اغمي عليا في وجود اتنين من اهلي اسرعوا لي بالعصير وفوقوني عقبال ما وعيت كان مخلص شوب العصير وملامحه غريبه وعجيبه من اهتمامهم بي وهو قاعد يشرب العصير ولا خضه ولا حرك ساكنا فهمت انه كان يسعي لرضا اهله بعد الشى ولا اعرف عن امه غير انها توفت وهو مراهق وكانت اطيب مو الاب الان شكيت فيها هي كمان واخواته الناجحين عنه انهم كلهم حقروا منه كان اصغر واحد ولم ينجح في كل شيء مثلهم لبس الوش الصالح واتقدم لاهلي وكلنا خدعنا فيه وحسبي الله اتمني لو احد منكم او ياريت الاستاذه يعزز رايي او ينفيه .

[@Teethtalk121]

كلامك كله صح. نفسي كنت اعرف ليه . شكرا .

[@hebahassan6755]

كلام ميه بالميه كيف وصفتي اللي يصير بالدقه دكتوره لك مني اجل احترام

[@Laila-rp6sb]

يا الللللللللللللللللللله !!! وانا اقوووووووووووووووول !!

[@ياالله-ص7ذ4ذ]

This is so true and happening with me 👍 thank you for this video my dear 🥰

[@hajaralmasri1603]

بيحب يتمنظر أمامهم

[@tinhinanetinhinane4910]

سبحان الله كانك تتكلمي على زوجي..... نفس التخطيط بتاعو.... يهرب من المسؤولية وووو... حقول إيه شكرا دكتورة

[@ahmedragheb3896]

أة يا دكتورة كوثر يارتنى عرفتك من زمان كانت حياتى اتغيرت 23 سنه ضاعوا من عمرى معاة وانا باعانى المر منه ومش فاهمه حاجه الحمدلله على كل حال

[@nglaafathy694]

لو سمحتى يادكتوره عوزا اتواصل معاكى ضرورى ومش عارفه

[@freefree-pz9rk]

شكرا ليك دكتورة بس يا ريت أمثلة أكثر و توضيح أكثر مثلا ازاي تعمل زيهم .. ازاي تعاملو بنفس طريقتهم؟ فتات الخبز او غيرها من نقاط لازمها شوية تفسير مع العلم ان الاختصار جميل و الإطالة اقل فائدة من الاختصار ربنا يجازيك خير 🌷🌷🌷💜💜💜💜💜

[@user-id-kawthers-sanad]

حبيبتي فيه فيديو مشروح فيه فتات الخبز بالتفصيل في القناة

[@شروقالشمس-ل8ظ]

@@user-id-kawthers-sanad ربنا يسعد قلبك يا استاذة كوثر ويجزيك عنا كل خير..ياريت تكون الحلقات اطول حتى نستفاد اكثر

[@freefree-pz9rk]

@@user-id-kawthers-sanad ربنا يجازيك خير 💓💓💓💓💓💓💓💓💓💓💓💓❤❤❤❤❤❤

[@monaasmar7047]

معقوله هل قد كلامك دقيق وبمحله ..

[@Mahodas]

ممكن أستاذة تتكلمي عن النرجسي والتعدد اللي عندي متزوج علي ولما يكون عندها بيحكي عني كويس ولما يكون متخانق معاها يسبها قدامي ولما يكون معاها سمن على عسل يشكر فيها ويدافع عنها وفعلا النرجسي بيتقوا عليكي قدام أهلو اذا كانو هما نرجسيين كوسيلة تقرب منهم لأنهم خصوصا الام بتكره شي اسمو ابنها بحب مرتو بتستمتع جدا اذا شافوت بيزلك وبهينك

[@noorhassan7741]

يااااه ربنا اخيرا خد أمه وريحني منها كانت تبكي وتزعق له وتغضب عليه لو جلس بجواري بس أمه غارت واخواته البنات اخدوا مكانها الله يلعنهم

[@sosowawamemo1620]

@@noorhassan7741 ماراح ترتاحين من هالعايله الله يعوضك بالجنه ان شاء الله

[@dinahafez7983]

بصي أي حاجة تضايقك هيعملها لو تقدري تنفصلي ارفعي قضية طلاق للضرر من زواجه الثاني

[@Man99k]

اتعلمت منك كتير قوي صحيح بعد ما جالي أمراض عضوية بس الحمدلله ده قدر ومكتوب وفعلا بقيت احسن وأشطر بكتيييييير بس الصراحة مش قادرة أتخيل أن في بني آدم ربنا مايقدرش يغيرو مش شاغلة دماغي انه يتغير خالص ولا فارق معايا بس كلمة عمرو ما يتغير النرجسي بخاف اقول كده لأن دي حاجة بيد ربنا واحدو بخاف اقول مش هايتغير ربنا يعاقبني ويتغير ويسبقني عند ربنا الله أعلم بالخواتيم لكن انا مش منتظرة انه يتغير الكلمة بتاعت مش هايتغير بحسها مش مناسبة لأن ربنا سبحانه فقط اللي يقول ده انا بقول مش منتظرة تغيير خلاص شلت الأمر موقفه الامال والمشاعر مشغلة بس الاعتناء بنفسي والدفاع عن حقي وحق ولادي وصحتي اللي بشوف الناس فسني ماشاء الله قمرات لما اسمع أن الثلاثينات أجمل سن للست وانا مريت بيها كلها عجوزة عيانة عشان كده هوا ده همي الدعاء لربنا انه يشفيني ولا يهلكني الظالم

[@nashwaahmed328]

انت معانا باليوم لحظه بلحظه

[@howidahelmy3198]

أعوذ بالله منهم ناس شر الحمدلله ربنا خلصني منه يروح بلا رجعه هو اصلا راجا ناقص

[@ntalynanosaly3843]

اي والله كنت قبل افكر حد قلبو عليي بس صح هلأ ماعاد يهمني لان عرفت انو مريض

[@فاطمهصغير-ر6ظ]

انا نفسي اعرف كيف اتعامل من ابني النرجسي

[@halaahmed9580]

يالهوي ...انا كنت بتعامل مع نرجسي واهله 😭

[@maissamohammad5657]

الله يحميك ويحفظك جزيت خير الجزاء

[@سلاموحبلكلالكون]

الله يرضى عليك...❤️🌺

[@kamalamr8638]

نفس اللي ببحصل معايا وانا بنهار كل يوم بسببه

[@نسمهفجر-ف6خ]

ما تنهاري لما يتجمعوا سيبيهم وشوفيلك حاجه اعمليها ماتقعديش معاهم..بالعربي طنشيهم كلهم

[@martendoneh5627]

اختي دكتورتي .. النساء هم النرجسيين الكثر والقانون هم من يغذي النرجسية بنفسيتهم . اتوقع النرجسي الزوج اقل من ٢٠% . كلامك رائع بل ووصف دقيق لكن للزوجة النرجسية ... ملخص هذا المرض هو فقط البعد عن دينا الحنيف فقط

[@توسهإبراهيم]

اهو دا شكرا جزيلا لك دكتورة 🌹

[@mahasa3561]

جزاك الله خير 💗

[@smsman9243]

اه لسه مضايقة اعدي المرحلة ده ازاي تعبت 😥

[@recipesaroundworld6327]

حضرتك لسه تعملي جلسات زووم ؟؟

[@mahMoud-gh2ti]

انتي بتوصفي اللي انا عشته في سنين

[@soumiaELABBADI]

هل ينطبق هذا الشيء على النرجسي الظاهر ؟

[@samsj4101]

أنا بالوقت الحالي ميش هاممني هو يروح يغور هو ونرجسيتو.أنا إلي مخوفني ديلوقتي بنتي الي طالعة بتشبهو. كيف اتعامل معاها وانقذها عشان متطلعش نرجسية.

[@نعوميبهجت]

بظبط اللى بيحصل معى حسبى الله ونعم الوكيل

[@moumalrazak4106]

سبحان الله دائما لما يشوف واحد من اهله لازم يجرحني ويوجهلي الاهانه امامهم ويخليني اصير اصير عصبيه واموت من القهر ودائما يكرر هاي العاده وميبطلها ابد ومن اكله ليش هيج تسوي يكول حتى ابينلهم رفضي الج