مصطفي سيد احمد - في الضواحي

كلمات والحان : خليل فرح
في الضواحي وطرف المدائن
يلا ننظر شفق الصباح
قوموا خلوا الضيق في الجناين
شوفوا عز الصيد في العساين
يلا نقنص نمرح نعاين
النهار ان حر الكماين
كلبي يا جمجوم أصلو خائن
شوفو كيفن يبرا الملاين
هب شالا وكشح المراح
للقنيص الخيل خف راسن
نحن ما بنخاف من مراسن
المكارم غرقنا ساسن
والمجاهل من غيرنا ساسن
ان عطشنا نمز مر وآسن
وان عشقنا بنعشق محاسن
في المحاسن كفي يومنا راح
ويا الطبيعة الواديكي ساكن
مافي مثلك قط في الأماكن
يا جمال النال في ثراكن
يا حلاة البرعن أراكن
في قفاهن تور قرنو ماكن
لا غشن لا شافن مساكن
في الخزام والشيح والبراح
ومال نسيم الليل ببرودك
نامت الأزهار فوق خدودك
غرد العصفور فوق عودك
النفوس ما اتعدت حدودك
ما عرفنا عدوك من ودودك
بس أنا المقسوم لي صدودك
يا حياتي وأملي اللي راح
شوف صباح الوادي وجمالو
شوف خدارو وعاين رمالو
شوف يمينو وعاين شمالو
شوف نسيم الليل صاحي مالو
شوف فريع النال من أمالو
والبدر خجلان من كمالو
والصباح لاح بهل الوشاح
ويا أم لسانا لسع معجن
كلمه كلمه وحروفا ضجن
ديل خدودك غير داعي وجن
ديل عيونك من نظره شجن
دا دلال أيه دا دلال معجن
محن الأمات يا رداح