麥明詩一早識 林作「新女」係牛津大狀

林作話女友麥明詩都識「新女」，原來佢真係冇講大話呀，有圖有真相！林作「新女」叫余穎洋Victoria，一樣係牛津高材生，有樣有學識。佢有幾叻？舊年做過終審法院嘅司法助理，而家係大狀，同林作咁高咁大。不過，林作話自己無辜喎！林作話：「我唔係一直鍾意Victoria，又唔係咁誇張，朋友啫！Louisa都識嘅，咁當然係我識先啦。」唔係一直鍾意，只係好like咁啫！有次Victoria放咗張著白裙仔嘅旅行相喺fb，林作留言冧爆：「我不敢再多看這張相一刻，因為我怕我會愛上你….噢，太遲了！」口花花仲影到夜晚一齊喺條街度，加埋啲fb留言，麥明詩梗係嬲嬲豬啦！林作話：「我唔係好肯定佢而家係唔係嬲呀，係佢真係好忙，未有心機同我傾下呢單嘢。佢係咪好嬲又未必係！我好肯定佢唔係好滿意我俾人有機會咁樣影咗。」
係囉係囉！影晒相，水洗都唔清啦！林作話：「我都要等佢拍完戲，有時間通電話同佢講清楚來龍去脈，成班人有男有女，好肯定我同個女仔朋友企得好開，唔係攬頭攬頸。」想解釋？咁人哋聽咗你電話未？「Errr…暫時係冇嘅。希望幫下手呼籲下佢叫佢打俾我。」我係林作，我個十優港姐女友麥明詩嬲咗我，大家可以幫吓我叫佢聽我電話嗎？聽完林作嘅呼籲，麥明詩有咩講呢？麥明詩話：「同佢啲嘢我唔回應住，你問番佢。其實都識嘅個女仔，我要拍嘢喇，遲啲再講啦。」
壹週Plus : hk.next.nextmedia.com
即 like 壹週Plus fb : nextmagazinefansclub