每日一片：師傅教壞學神？ 強制停車線直行直過

為考獲車牌，學車一族在馬路上當然要規規矩矩，加上師傅在旁，絕少會「行差踏錯」，不過師傅亦可能有「睇漏眼」的時間。今早(2日)就有車Cam拍得一架學神疑罔顧地下劃有強制停車的雙白線，直行直過，不過網民認為未必錯在學神身上，其師傅才責無旁貸。
事發於今早約11時，當時掛上「學」字的一部學車沿葵涌葵益路準備駛進葵涌道，學車沿途一直慢駛，似是十分穩陣，惟駛近路口位，現場地下劃有「停」字及雙白線標誌，示意駕駛者必須停車，未知學神未為意還是「發緊夢」，竟完全無視交通標誌直駛出葵涌道。
不少網民質疑學神夠大膽，更分享曾遇上類似場面，「怪唔得知咁多P牌司機係唔識揸車啦，亂X咁嚟！」、「學車衝紅燈都見過」。亦有人狠批其師傅：「依家係個師傅自己冇煞停架車。學生發夢都好，個師傅仲衰過佢」。
根據法例，停車標誌及道路標記──即使大路上並無其他車輛，也必須在停車線前停車。等待至車流出現安全的空檔時，才可開車前進。如有行人正在橫過或等候橫過小路，必須讓路。

[@charlieyuen7889]

自己都唔停車，重話人哋。。。