Рет қаралды 33,493
#partiakomuniste #shqiptaretneperbote
“Sabotimi në naftë”, dy pushkatime e 157 vite burg për 6 inxhinierë.
Selenica: Nafta s’u zbulua nga inxhinierët, por nga Partia e shoku Enver.
“Si e vranë veten Piro Gusho dhe Tomi Kristo”
“Haki Toska e Adil Çarçani, 120 pyetje pa përgjigje për Gushon”
“Unë dhe Koço Theodhosi jemi koka e kësaj veprimtarie, kurse Lipe Nashi e të tjerët janë ekzekutorët, pohoi në seancë gjyqësore Abdyl Këllezi”. Ky është një fragment nga dokumenti i procesit gjyqësor të Abdyl Këllezit, Koço Theodhosit, Kiço Ngjelës e Vasil Katit, në Kolegjin Penal të Gjykatës së Lartë zhvilluar me dyer të mbyllura nga data 3 deri më 17 maj 1977, “Sabotimi në naftë”. Por, goditja e të ashtuquajturit “grupi sabotator i naftës” nisi që në vitin 1974 dhe është ndër tragjeditë më të mëdha gjatë sistemit komunist, sa i përket inteligjencës shqiptare. Inxhinierët e lartë Koço Plaku dhe Milto Gjikopulli u pushkatuan.
Të njëjtin fat patën edhe Abdyl Këllezi, anëtar i Byrosë Politike të PPSH, ish-ministër i Ekonomisë e zv.kryeministër i Shqipërisë në vitet 1945-1975, si dhe Koço Theodhosi, anëtar i Byrosë Politike të PPSH dhe ministër i Industrisë e Minierave. Pushkatimi ndodhi në vitin 1976. Dhjetëra inxhinierë të tjerë u kalbën burgjeve me dënime maksimale, disa u internuan, u dëbuan, u ulën në detyrë. Ndërkaq, pati edhe prej atyre që vranë veten, përpara se t’i vriste sistemi, siç ishte rasti i Piro Gushos, Tomi Kristo etj. Nga këta, tashmë të mbijetuar nga vala e ndëshkimeve të Enver Hoxhës nga vitet 1974-1986 kanë mbetur gjallë vetëm 6 persona: Kadri Rama, Luan Këlliçi, Petrit Sadushi, Dhimitër Stefa, Jani Konomi dhe Nuredin Skrapari.