МІРЖАҚЫП ДУЛАТҰЛЫНЫҢ ЖАНАЗАСЫН ШЫҒАРҒАН ИМАМ!

Белгілі дін қайраткері, Тәуелсіздік алғаннан бері дінге қызмет етіп, бірнеше шәкірттер тәрбиелеген, қазіргі кезде Қостанай қалалық "Жайлаубай ата" мешітінің бас имамы Әмірханов Шоқан қажы Ғазизұлымен сұхбат.
Қазақ халқы Алаш ардақтысы, көрнекті ағартушы, қоғам қайраткері, ақын-жазушы Міржақып Дулатұлын ерекше ардақ тұтады. Киелі Торғай өңірінде туып өскен. Артында өлмес-өшпес мұра қалдырған қайталанбас тұлға. Осыдан отыз жылдан аса яғни 1992 жылғы көршілес Ресейдің Карелия аймағының Сосновец бекетіне бір топ азамат сапарға шықты. Оларды белгілі жазушы ҚР-ның еңбек сіңірген қайраткері Қайсар Әлім бастап барды. Екі мемлекет арасындағы жасалған келісімге сәйкес Міржақып атамыздың сүйегін туған жері Қызбел ауылынан 45 шақырым жердегі Бидайық елді-мекеніне алып келді. М.Дулатовтың сүйікті қызы Гүлнәр апамыздың арманы көзі тірісінде әкесінің сүйегін кіндік қаны тамған жерге әкелу еді. Арада кп уақыт өтпей сол ауылға Міржақып атамыздың есімі берілді. Жангелдин аудандық мешітте бас имам болып істеп жүрдім. Алланың жазуымен қыркүйек айында Міржақып атамыздың әкелген сүйегін ырымын жасып, ғұсыл алдырып жаназа намазын оқыдым. Сөйтіп Алланың қалауымен туған жеріндегі топырағына жерлеп, мұсылмандық рәсімдерімізді жасап, парызымызды атқардық.