ما يحتاجه محصول القطن في تلك الفترة الحرجه من حياة النبات للتغلب على الظروف البيئية الصعبه

الساده مزارعي القطن كل عام وانتم بخير
الهدف من نشر بعض المعلومات والعمليات الزراعيه هو الحصول علي اعلي إنتاجية من الفدان لتحقيق ربح للمزارعين
والان اتكلم عن عمليه يقوم بها بعض المزارعين دون وعي لما تسببه من مشاكل الا وهي ٠
٠٠٠٠ العرنصه ٠ والبعض يسميها خصي ٠ والبعض يسميها قصف القمه الناميه ٠٠ والصح هي عمليه التطويش
متي نلجأ الي هذه العمليه ولماذا
اولا يجب أن نعلم ان القطن يتمتع بظاهره تسمي ٠٠ السياده القميه ٠٠ يعني ايه
يعني ان البرعم الطرفي اللي موجود علي قمه الساق من فوق هو اللي بينتج فيه مجموعه الهرمونات والاوكسينات اللي بتنظم عمليه النمو في باقي أجزاء النبات
طول ماهذه القمه الناميه موجوده فهي تثبط نمو او تنظم نمو باقي القمم الناميه علي الفروع الجانبيه
طبعا كيف يتم ذلك ده عاوز بحث وكلام كتير جدا ليس هنا مجاله
لكن اللي عاوزين نعرفه ان البرعم الطرفي ده او القمه الناميه اللي علي الساق ينمو لاعلي وطول ماهو موجود مفيش قمه ناميه علي الافرع الجانبيه تقدر تتخطي المسموح لها ٠ وده باختصار مايسمى بالسياده القميه ٠ وطبعا مش كل النباتات او المحاصيل بتتمتع بهذه الظاهره
بعد مافهمنا يعني ايه سياده قميه وأن البرعم ده هو اللي بيرسل الاشارات لباقي البراعم ويتحكم فيها ماذا يحدث لو قمنا بتطويش او قصف هذا اليرعم الطرفي او القمه الناميه
اللي يحصل ان النبات يفقد السيطره علي باقي القمم الناميه علي الفروع الجانبيه
وكل قمه ناميه تتوكل علي الله وتمنو بطريقه عشوائيه وغير منتظمه شمال ويمين ويبقي عندك غابه ونبات غير منتظم وده من غير زياده في الثمار او المحصول
طيب أمته نلجأ للتطويش او الخصي
اذا وجدت نبات القطن يميل الي الهياج الخضري ٠ وده له أسبابه واعراضه ومن اعراضه الاستطاله الزايده والأوراق مفلطحه وعريضه ٠ والمسافات بين العقل كبيره الخ
طيب هل لو شوفت المظهر ده اطوش علطول طبعا لا ممنوع الا بقاعده
ماهي الشروط او القاعده اللي ممكن اطوش عندها
اولا
القطن اللي منزرع بدري
اعد من عشرين الي خمسه وعشرين فرع ثمري هنا ممكن اطوش
ثانيا
القطن المنزرع متأخر
اعد من ١٨ الي ٢٠ فرع ثمري ممكن اطوش
طيب اطوش ازاي
ممنوع ازاله جزء كبير من هذه القمه الناميه
اومال اعمل ايه
افرك اخر ورقتين علي القمه الناميه بالاصابع فقط ثم افرك باقي القمم الجانبيه علي نفس النبات
يعني مش اللي فوق فقط لا وكمان اللي تحت
بكده تسيطر علي نمو النبات وتحجمه دون اضرار
طولت عليكم شويه وفي لقاء آخر هنتكلم عن ازاي اكتشف ان القطن هيعمل هياج خضري وازاي اسيطر عليه

[@عبدالكريمعليان-ث8ز]

ربنا يبارك فيكم جميعا يارب العالمين أنتم أهل العلم والعلماء ورثة الأنبياء والمرسلين والعلم هو القائد أفضل قناة زراعيه و بعلمائها الأجلاء ❤❤❤❤❤❤❤❤❤❤❤❤❤❤❤❤

[@redaelian1268]

شكرا جزيلاً يا استاذنا الفاضل

[@SoaadHamza-b2g]

أفضل نوع بوتاسيوم رش

[@redaelian1268]

@@SoaadHamza-b2g نترات البوتاسيوم سلفات البوتاسيوم