Macikj - Neprebol (Official Video)

Текст: Мациќ
Видео Продукција: Јован Јанковски
Нарација: Ане Блажевски
Вокалот е снимен во студиото на Ане Блажевски
Голема блАГОдарност до Владимир Аговски - Аго.
Текст:
Што го нема нема песно
мене да ме нема него што го немам.
Дали зборовите ќе ти го
оправдаат чинот свршен пред другите
зашто јас веќе ти го простив.
Прости ми што доцнам со пишаново,
ме уморија жолто-сончевите зраци
стоејќи на гробот твој,
се згрбавив од својот крст на
плеќиве од чемер,
и секој ден свеќа ти палам,
да ти биде светло таму,
да не се сопнеш таму,
да ти е топло таму
ако тоа таму студи.
Дали тоа таму повеќе ти ги
разбира бремињата од
тука твоите кои те плачат?
И дали знаеше дека кога
ќе дојде часот сите бегаат и
ќе те остават сам?
Не ме почека заедно да умреме.
Би ја извлекол тагата од твојата утроба
како конец во небесно сина боја
да не заплачеш никогаш повторно,
би се нурнал во најдлабокиот амбис
на твојот бол,
во суштината на твоето битие
во најкревката точка од твоето постоење
пред чинот свршен и би те предомислил,
би провалил во најдлабоките бездни
кои ги сокриваш и од самиот себе,
би ја запалил со најсилен оган
црната наметка на немоќ и самотија
што се надвиснала како сениште
врз твоите надежи,
и ќе ги занемам сите гласови кои
те поттикнале на чинот свршен.
И ајде кажи ми сега,
што имаше таму за натаму да одиш?
Да оставиш се',
на се' да заборавиш,
а се' на тебе да не заборави,
и се' на тебе да потсетува.
Не се разбра ли со животот
па мислеше смртта ќе ти ги
сфати лелеците?
Што ме нема нема песно,
ни тука со себе
ни таму со него.

[@IvanMitkovski-z7w]

Од душа напишано, браво

[@auraanastasova]

👏

[@elenamishkoska85]

Го знаете она чувство кога сте искачени на висина и одозгора ги гледате безбројните светилки на градот, и секоја светилка ви буди емоција? Ете толку многу чувства има во Непребол.. Секоја светилка емоција, секоја длабока, од чиста почиста, искрена и непреболена.. Непребол е ремек дело, дело кое може да го напише само човек со душа, а се слуша со солзи во очите но ти влева надеж во срцето, бидејќи е доказ дека се уште постојат такви луѓе, доказ дека меѓу народот постои човек.. Човек кој свети посјајно од сите светилки во градот.