მამუკა ბერიაშვილი - თავისუფლების იდეის ისტორიულ-გამოცდილებითი და სპეკულატიურ-დიალექტიკური ბუნება

👨‍🏫 23 მარტს, 15:00 საათზე, კავკასიურ სახლში გივი მარგველაშვილის სახელობის ლიტერატურულ-ფილოსოფიურ კვლევათა გერმანულ-ქართული ინსტიტუტის ეგიდით გაიმართა ჰეგელის საერთაშორისო საზოგადოების წევრის, პროფ. მამუკა ბერიაშვილის საჯარო მოხსნება „თავისუფლების იდეის ისტორიულ-გამოცდილებითი და სპეკულატიურ-დიალექტიკური ბუნება (ანტიკური სამყარო)“
🔴 თავისუფლების ცნება და მისი კონოტაცია ადამიანის სულიერი განვითარების ისტორიაში, როგორც ამას ამ ცნების განვითარების სპეკულატიურ-დიალექტიკური ბუნება აჩვენებს, სხვადასხვა დროისა და ეპოქის მიხედვით იცვლის შინაარს, რომელიც, ხშირ შემთხვევაში, სოციალური ბუნებით და სოციუმში დამკვიდრებული კომუნიკაციური ფორმებით არის განსაზღვრული.
თავისუფლება-არათავისუფლების დაპირისპირება, როგორც საკუთრივის/შინაურის და უცხოსი, ანტიკურ გაგებაში/აზროვნებაში კიდევ უფრო იკვეთება ჰომეროსის შემდგომ ეპოქაში. ამ შემთხვევაში, თავისუფლება ცალსახად პოლისური ენის (პოლისის როგორც კულტურულის, შინაურის გაგების) სიტყვა/ცნებაა.
თავისუფალი აქ თავად პოლისი, მისი მიწა/ტერიტორიაა, როგორც ღვთაებრიობის განსხეულება, ღვთაების მიერ დამყარებული წესრიგი/კოსმოსი (წესრიგს კი სამართალი და კანონები გააჩნია); - საპირისპიროდ ქაოსის/უწესრიგობისა, ანუ ბუნებრიობისა, რომელიც კულტურისათვის მტრული ფენომენია (სადაც არც სამართალია და არც კანონები).
სიტყვა ἐλεύθερος (თავისუფალი) ფილოსოფიურ კონოტაციას პირველად სოფისტების აზროვნებაში იძენს, რომელშიც φύσις და νόμος რადიკალურად უპირისპირდება ერთმანეთს. მოხსენების ფარგლებში განხილული იქნება თავისუფლების გამოვლინების ფორმები ძველ-ბერძენ და რომაელ მოაზროვნეებთან და სპეკულატიურ-დიალექტიკურად, ნაჩვენები იქნება, თუ რა გეშტალტს იძენს თავისუფლების ცნება ჰომეროსის, პლატონის, სოკრატეს, არისტოტელესა და ციცერონის ნააზრევში.