Рет қаралды 3,617
Облыс орталығынан 100 шақырым жерде орналасқан, Күршім ауданына қарасты Маралды ауылының тұрғындары алтын фабрикасының салынуына қарсы. Аталмыш мәселе талқыға салынған қоғамдық тыңдауларда тұрғылықты халық өз пікірін білдірген. Осыған байланысты алтын өндіруші компания құрылыс жұмыстарын бастай алмай отыр. Тұрғындарды алаңдатқан түйткілді мәселені облыс әкімі Даниал Ахметов тікелей өз бақылауына алып, бүгінде істің мән-жайын анықтауға бағытталған тиісті жұмыстар жүргізілуде.
Фабрика салғысы келетін компания өкілдері жобаның қоршаған ортаға кері әсері жоқ дегенімен, тұрғындар мұнымен келіспейді. Көпшілікті алаңдатып отырған жайт, алтыны бар кен ашық жолмен қазып алынбақ. Сондықтан бірінші кезекте осы мәселеге назар аудару керектігін алға тартқан Маралды ауылының тұрғындары, облыс әкімі мен аймақтың бас прокурорына жүгінген.
Маралды ауылының тұрғындарына арналған бейнеүндеуінде өңір басшысы аталған мәселе бойынша Индустрия және инфрақұрылымдық даму, Экология және табиғи ресурстар, Ауыл шаруашылығы министрліктеріне бірнеше рет хат жолдағанын баяндады. Онда жер қойнауын пайдаланушыларға қатысты бақылау жүргізу, экологиялық келісімнің негізділігіне және қазіргі уақытта сот рәсімдері жүріп жатқан жер учаскелерін берудің заңдылығына тексеру жүргізу қажеттілігіне баса мән беріліпті.
Сондай-ақ, облыс әкімінің құзырлы министрліктерге жолдаған хатында: Жер Кодексінің қырық үшінші, тоқсаныншы, тоқсан жетінші және Экологиялық Кодекстің екі жүз отыз алтыншы, екі жүз отыз жетінші баптарында анықталған заңдық қайшылықтар туралы айтылады. Қазіргі уақытта облыс әкімінің орынбасары мен өзге де жауапты мамандар тобы бірнеше министрлікпен жұмыс істеуде. Талай уақыттан бері Маралды халқын сарсаңға салған түйткілді мәселе аймақ басшысының тікелей бақылауында.