Maye Safet. Sebzeler ve meyvalar. Dilâra Abibullanıñ sesinen.

Maye Safet.
Sebzeler ve meyvalar.
Dilâra Abibullanıñ sesinen.
Alma
Men bir güzel almaçıq,
Tomalaçıq yanaçıq.
Yağmur suvuna toydım,
Şeker-şerbetke toldım.
Qarpız
Meni top dep, belleme,
Pek qattı dep, oylama.
İçimde tatlı şerbet,
Qana, aytçı adımı!
Qızıl turup
Qırmızı yanaqlarım,
Erte baarde olurım.
Özümni maqtamam,
Amma tez-tez aşalam.
Qabaçıqlar
Küneşte qızıp yatamız,
O yaq-bu yaq aylanamız.
Yeşilce tüsümiz,
Lezetlimiz özümiz.
Havuç
Saçlarım örme uzun,
Daa mende uzun burun.
Çıqarmam bostandan burnumı
Saqlansam, taparsıñ meni?
Pamidor
Bostanda ösem,
Küneşte pişem.
Suvumnı tomat yapalar,
Şorbağa onı qoyalar..
Hıyarçıqlar
Ağa-qardaş hıyarçıqlar,
Şeñ ve sağlam oğlançıqlar.
Taze-taze, bostandan,
Küzde - turşu çapçaqtan,
Begeneler lezetni,
Qıtırdağan hıyarnı.
Hıyarlarnıñ qorantası
Suvarsañız, quvana
Hıyarçıqlar tez vaqıtta
Öse, yetişe, örkeni uzana.