أحمد بن عبدالعزيز البوعينين .. قصيدة الطير

يا طير أكفخ لا تردّك هقاويك
أرْدّ الوصل يا طير لا يشح وِرْدّه
ما جيت أسلّي خاطري في حراويك
جيتك بقلبٍ متعبه حمل سدّه
ضميان عرق وعرق يصرخ لك أبغيك
يا كيف يضمى وأنت عينه وعدّه
أكذب وأقول إنّي على البُعد ناسيك
وأصدّ وجهي ودمعته فوق خدّه
شفت الخلوج اللي تبكي، شفت هذيك؟
اللي تبكي صلف الرجال شدّه
عزّي لحالٍ مثلها ولاني مخفيك
شيٍ ذكرته وشي مقدر أعدّه
لكن بقلبي كلمةٍ لزمٍ تجيك
أسمعها مني بين شدّه ومدّه
ما دام لي قلبٍ يعزك ومغليك
والله يبطي ثقل عقلي يردّه
مجنون .. عاقل بس لي قلب شاريك
صافي مودّه ومتعبه زود ودّه
روّح وشوف قلوب منهم حواليك
ومسموح مني لو تماديت مُدّه
طيري وأعرفك هدّتك ما تنسيك
عروق كفٍ حالفٍ ما تهدّه
أطلق سبوقك وكل مابي يناديك
أبيك تعرف كل قلبٍ وحدّه
أبوك .. أمك، كل ربعك عوانيك
ما فيهم اللي مثل قلبي وقدّه