مداح الرسول ....مقتطف من الشعر الملحون♪♫ ولد سيد الحاج القبلاوي رحمه الله

بإسم المولى باش بديت في ديواني ♪♫ من روائع الشعر الملحون بأولف أدرار الجزائر
بسم المولى باش بديت في ديواني
والصلاة على الرسول سعدي بيه
اطلق ليا لساني باش نمدح بيه
والصلاة على الرسول سعدي بيه
اطلق ليا لساني يالله العالي
حرمة مولى الجاه اللي اعطيت ليه
حرمة بجاه العدناني لا تحرمني
عجل باللي ليا الخيرة فيه
سبحانك يامولى الملك يا سلطاني
راه اللي فالقلب انت العالم بيه
متمني غير الا زيارة الميداني
رسول الله راه القلب مولع بيه
سهل لي فيها ياخالقي واهديني
والهمني اللي جانا الهادي بيه
لايفتح لي فيه حرام ما يعجبني
الانمشي يوم الحساب نوقف بيه
فرض من القصاص والصراط والميزاني
تما اللي عند حسنات ترشح بيه
. واللي عند سيئات يضحى دوني
ديك النفس مع الشيطان زلغت بيه
.يحسب هذا الدار خلود غير اضني
ومليكة الموت تقلب فيه
. زيينها الشيطان النصراني
واللي تبعو راه تلف خليه
. غير تبعني محال ما يفرقني
شاكي منو الله خالقي يجليه
. ما يفعل فعل الخير النصراني
بحر عامق لانمشي نهود فيه
. اندهت رجال الله كاملا ما يعنيوني
حتى واحد فيهم ما غنيت عليه
. من شق الشرق للغرب والسوداني
واالهضرة والساحل ڨاع بماليه
. وتوات اللي فيها سمعوني
بن خيرة جلول أنا نبرح بيه
. يامولى بغداد الغوت يا سلطاني
عين عبدك عيب عليك تكلح فيه
. متوسل ليك بالواحد الفوڨاني
مول الخير اللي لا بدا قسم فيه
. يعطيني منو قسمة اللي ترضيني
وأنا راقد حاشا ما تعبت عليه
. كل شي موجود هو الغاني
مول الخير الا لبدا قسمي فيه
. نختم قولي بالصلاة على المداني
رسول الله بيت الحرم هاري ليه
. ما نرى حر ولا صهد من نيراني
سلك فوق الصراط ننجى فيه
. تغفر لأمي وأبي والجيراني
واللي سمع نظمي كان حاضر ليه
. عبد العزيز إسمي راه من يعرفني
بن امحمد بويا فرض لي نسميه
. بن محمد بن عمر التيليلاني
وبلاد مهدية ساكن فيه