Рет қаралды 16,666
Harada olmağımızdan asılı olmayaraq öz evimiz qədər ikinci rahat bir məkan tapa bilmərik. Bu rahatlıq və komfort isə evimizdəki əşyalardan daha çox asılıdır. Amma bu əşyaları, xüsusilə mebeli alarkən keyfiyyətinə xüsusi fikir vermək lazımdır. Bu gün kifayət qədər mebel salonları var ki, burada istənilən mebeli tapmaq mümkündür. Lakin qiymətlərə gəlincə bir qədər tərəddüd etməli oluruq. Səbəbini əməkdaşımızın araşdırmasından biləcəksiz.
Artıq 10 gündür ki, Məhərrəm ayının başa çatması ilə toy mövsümü başlayıb. Toy mərasiminə hazırlıq gəlinlik seçimi, mərasimin keçiriləcəyi məkanın tapılması kimi mərhələlərlə yekunlaşmır. Hələ bunun cehizlik mebel seçimi mərhələsi də var. Demək olar ki, toyun əsas xərcləri də elə bu seçim zamanı ortaya çıxır. Hazırda həm zövqlü, həm keyfiyyətli, həm də ucuz mebel tapmaq çətin məsələdir. Ölkəmizdə yerli istehsal mebellərlə yanaşı İtaliya, Rumıniya, Türkiyə, Yunanıstan kimi ölkələrin istehsalı olan mebellərə də rast gəlinir. Mebellərin ən bahalısı müştərinin seçiminə görə dəyişir. Mebelin hazırlandığı material, gətirildiyi ölkə, hətta rəngi də onu bahalaşdıran amillərdəndir. Bəzi mebel salonlarına baş çəkib qiymətlərlə maraqlandıqda təəccüblənməmək mümkün deyil.
Satıcı Bəsti Tahirova: “Məsələn xarici mebellərdə yataq və qonaq dəstləri 4000-5000 manata olur. Yerli istehsal olan mebellər isə 2500-3000 manatadır. Ona görə də alıcılar yerli istehsala çox üstünlük verirlər.”
Mebel satışı ilə məşğul olanlardan öyrəndik ki, hazırda salonlarda xaricdən gələn mebellərin alıcıları azlıq təşkil edir. Hətta bu mebellər baha olduğundan bəzi mağazalar bu malları endirimlə təklif edir. Ölkəmizdə istehsal edilən mebellərin satıldığı dükanlarda isə alıcıların sayı çoxluq təşkil edir. Toy mövsümündən əlavə, həm də bayram ərəfəsi olduğu üçün alıcıların sayında nisbətən artım var.
Satıcı Rəisə Cəbiyeva: “Gün ərzində 10-15 nəfər müştərimiz olur. Ən çox bayramla əlaqədar həm çehizlik dəstləri satırıq həm də yumşaq mebel dəstlərinə daha çox üstünlük verirlər. Həmçinin stol-stullarda çox satılanlardandır.”
Rayonda bir neçə mebel salonlarında satılan mebellərin çoxu yerli istehsaldır. Yerli mebellərin qiyməti həm alıcılar həm də satıcılar üçün sərfəlidir. Digər tərəfdən alıcılar yerli istehsalın keyfiyyətindən də razılıq edir.
Alıcı Simuzər Qurbanova: “Gəlib nəvəm üçün yataq dəsti almışam. Endirim də etdilər xoşumuza gəldi çox əladı. Yerli istahsal olan mebeldən veriblər bizə.”
Araşdırmamızın sonunda belə qənaətə gəldik ki, cehizlik mebel seçimi mərhələsində bir evə normal dəst almaq üçün yerli istehsala təxminən 10 min manat, xarici istehsala isə 20-30 min manat civarında pul xərcləməliyik.