MSH - 27.01.2024 - Fjala e Myftiut Imam Muhamed B. Sytari në Konferencën e 12-të të imamëve

Zhvillohet konferenca e 12-të vjetore e imamëve: "Njeriu, bartës i amanetit!"
Paraditën e së shtunës, më 27 janar 2024, në xhaminë Kiras u zhvillua konferenca e 12-të vjetore e imamëve, teologëve dhe thirrësve islamë të Shkodrës, me temë: "Njeriu, bartës i amanetit!"
Referatet e përgatitura nga imamët ishin të larmishme dhe interesante, me tefsire të ajeteve kur'anore, komentime të haditheve profetike dhe tema të tjera fetaro-shkencore, rreth përgjegjësisë dhe amanetit njerëzor, me të cilin Allahu i Madhëruar e ka ngarkuar njeriun në këtë botë.
Në fjalën e tij, Myftiu i Shkodrës, Imam Muhamed B. Sytari, ndër të tjera tha: "Vendi i predikuesit nuk duhet t'i lihet dokujtdo, por atij që zotëron të gjitha cilësitë e meritueshme të një predikuesi. Dekadat e fundit po bëhen përherë e më shumë më të egra për muslimanin shqiptar, thuaj këtu me njeriun mbarë, atë evropian dhe në mbarë botën, duke i afruar atij modele dhe shembuj që nuk janë e as nuk mund të jenë bashkudhëtar me botën e tij, me shpirtin e besimit dhe vlerat e Islamit. Ditë pas dite, shoqëria jonë islame po përballet me një propagandë sa të fshehur, aq të dukshme në thelbin e të cilës është frika ndaj Islamit dhe tendenca për ta paraqitur atë si një fenomen keqbërës e të kobshëm, që për shekuj e shekuj i paska mbërthyer për fyti shqiptarët dhe i cili duhet të çlirohet patjetër nga ky islam e të kthehet në fenë e të parëve, e të kthehet, e të kthehet... çfarë nuk po dëgjojmë e dëgjojmë prej lajthitjeve kolektive aty këtu në trojet tona shqiptare. Por kjo nuk është e vërtetë, është qesharake, është paradoks..!"
Në konferencë u spikat roli i njeriut besimtar dhe musliman në bartjen e amanetit të të qenurit mëkëmbës i Zotit në tokë dhe se njeriu ka përgjegjësinë kryesore në mbarëvajtjen e jetës në tokë.
Në këtë konferencë referuan:
1. Imam Muhamed Sytari - Tefsir: “Kush i përmbahet udhëzimit Tim, ai nuk ka për të humbur (në dunja) e as nuk ka për të dështuar (në jetën tjetër)” - (TaHa: 123)
2. Adem Pizga - Komentim i hadithit: "Më i dashuri i njerëzve tek Allahu është më i dobishmi i tyre..."
3. Anis Agovi - Komentim i hadithit: "Çdonjërit prej jush i tubohet krijimi i tij në barkun e nënës...”
4. Arben Halluni - Personaliteti njerëzor
5. Ardit Hoxha - Tefsir: “Unë do të bëj në tokë mëkëmbës!” - (El-Bekare: 3)
6. Ardit Ulqinaku - Tefsir: “Ne ia prezantuam amanetin qiejve..!” - (El-Ahzab: 72)
7. Durim Kasemi - Tefsir: “Të pyesin ty për shpirtin!” - (El-Isra: 85)
8. Ensar Ismajlaj - Tefsir: “Ju kemi bërë popuj e fise, që të njiheni!” - (El-Huxhurat: 13)
9. Lavdrim Hamja - Humanizmi dhe toleranca e muslimanëve përgjatë historisë
10. Naim Drijaj - Tefsir: “Njeriu është i ngutshëm!” - (El-Isra: 11)
11. Samel Haxhija - Rinia në Kur'an dhe në Traditën e Hz. Muhammedit (a.s).
Kjo konferencë ishte e 12-të, të cilin Myftinia Shkodër e organizon me imamët, teologët dhe thirrësit islamë të Shkodrës. Të gjitha referatet e mbajtura në konferencë botohen në një libër të veçantë në mënyrë të zgjeruar.