Рет қаралды 18,017
မြန်မာ့ရိုးရာမုန့်လေးတခုဖြစ်တဲ့ မုန့်ကတိုးဝါလေးပါ။
မနက်ဟင်းစျေးတွေမှာ တခါတလေ ရောင်းကြလေ့ရှိပါတယ်။ မုန့်လုပ်နည်းလေးက မြန်မာ့ရိုးရာ မုန့်လုပ်နည်းများစာအုပ်ထဲက အတိုင်း ပြန်လုပ်ထားပါတယ်ခင်ဗျာ။
မုန့်အစာသွပ်ရန်အတွက် ပဲလွန်းကို နို့ဆီဗူး တဝက်လောက် ရေဆေးပြီး ၁ ည ရေစိမ်ထားပေးပါ။ ရေခဲသေတ္တာထဲထည့်ပြီး စိမ်ထားတာတော့ ပိုကောင်းပါတယ်။ အခန်းအပူချိန်ဆို အခန့်မသင့်ရင် ချဉ်သွားတတ်ပါတယ်။ ရေစိမ်ထားတဲ့ပဲတွေကို ရေသန့်နဲ့ နူးအိတဲ့အထိ ပြုတ်ပေးပါ။ လက်နဲ့ဖိလိုက်လို့ ပျော့အိသွားရင် ရပြီဖြစ်ပါတယ်။ ပြီးရင် ရေစစ်ထားပေးပါ။ ပဲအနှစ်လုပ်ဖို့အတွက် မုန့်လုပ်ထန်းလျက် ၅ ခဲလောက်ကို ရေထည့်။ ဆားထည့် ပြီး ကျိုထားပေးပါ။
ပြုတ်ထားတဲ့ပဲတွေကို ငရုတ်ဆုံနဲ့ ထောင်းလို့ရသလို ကြိတ်စက်နဲ့ ကြိတ်ပေးပါ။ ပြီးရင် ဒယ်အိုးထဲထည့်ပြီး ခုနက ကျိုထားတဲ့ ထန်းလျက်ရည်တွေပါ ထည့်ပြီး မီးအပူပေးပါ။ မိမိစိတ်ကြိုက်အချိုထည့်လို့ရပြီး ပဲနှစ်ပုံစံဖြစ်ပြီဆိုရင် ရပြီဖြစ်ပါတယ်။
မုန့်သားလုပ်ရန်အတွက် ကောက်ညှင်းကိုနို့ဆီဗူး ၂ ဗူး။ ဆန်မှု်န့ကို နို့ဆီဗူး ၄ ပုံ၁ပုံ ။
မုန့်ဖုတ်ပေါင်ဒါ - အနည်းငယ်
ဆား - အနည်းငယ်
ထည့်ပြီး အမှုန့်တွေကို နှံစပ်အောင်မွှေပေးပါ။
ပြီးရင် ရေအေး သို့ ရေနွေးကို နို့ဆီဗူး ၁ ဗူးစာထည့်ပါ။ တခါတည်း အကုန်မထည့်ဘဲ ဖြည်းဖြည်းချင်းထည့်ပေးပါ။မုန့်သားပျော့ပျော့လေးရပြီဆိုရင် နာရီဝက်လောက်နှပ်ထားပေးပါ။
မုန့်လုံးကြီးလုပ်သလိုပါပဲ. မုန့်သားကို တဆုပ်ယူပြီး ပဲနှစ်တွေထည့်ပေးပါ။ မုန့်ကတိုးဝါမှာ ပဲနှစ်လေးက ချိုချိုလေးဖြစ်နေမှ ပိုစားကောင်းပါတယ်။
ပြီးရင် မုန့်တွေကို ဆီနဲ့ မီးအားနည်းနည်းလေးပဲ ထားပြီး ကြော်ပေးပါ။ မီးအားပြင်းရင် မုန့်ပေါက်တတ်ပါတယ်။
မုန့်က ကြော်ရင်းနဲ့ ပွလာပါလိမ့်မယ်။ မိမိစိတ်ကြိုက် အဝါရောင်ဖျော့ဖျော့ သန်းလာရင် ဆယ်ပြီး သုံးဆောင်နိုင်ပါပြီ.
အလွယ်တကူ အိမ်မှာလုပ်စားနိုင်တဲ့ မြန်မာ့ရိုးရာမုန့်လေးတခုလည်းဖြစ်ပါတယ်။
သူငယ်ချင်းအားလုံးကျန်းမာပျော်ရွှင်ကြပါစေ။