#مؤثرين_في_2021

يوم السبت 3 إبريل 2021 كان حدث فارق في مصر لما كلنا اتفرجنا على موكب المومياوات، وفي وسط التنظيم العظيم، والأزياء اللي ماحصلتش كلنا سمعنا "أنشودة إيزيس" ولفتت نظرنا بموسيقاها المهيبة رغم إننا ماكناش فاهمين ولا كلمة! وفي ثواني السوشيال ميديا اتملت باسم "هشام نزيه" الملحن والمؤلف الموسيقي المصري اللي قدر يدمج الالآت الموسيقية الحديثة في الأوركسترا بالربابة والناي والهارب وحسينا إننا بنسمع ألحان فرعونية!
نرجع بالزمن لـ1992 في فيلم "آيس كريم في جليم"، ورا عمرو دياب واقف شاب بيعزف على جيتار مستخبي وسط الفرقة لكن بعد سنين مش كتير هيكون واحد من أهم مؤلفين الموسيقى في مصر، هشام نزيه سمعنا اسمه وحفظنا مزيكته من أول فيلم اشتغله هشام نزيه "هيستريا" ولحد النهارده دايما موسيقاه مميزة وفريدة ومختلفة.
مين يقدر ينسى "السبع وصايا"، "العهد"، "الفيل الأزرق"، "إبراهيم الأبيض" وغيرهم كتير، قدر هشام نزيه يخلي الناس تخرج من الفيلم تتكلم عن مزيكته وتقول اسمه وتدور على الموسيقى عشان تخليها رنة للموبايل، وخلى الموسيقى العربية توصل للعالم كله، وعشان كده استحق تكريم مهرجان الموسيقى العربية في دورته الـ30 في نوفمبر 2021 لأنه شرف الموسيقى العربية وخلانا نحب ونسمع موسيقى مختلفة، عشان الحاجات دي وأكترهشام نزيه واحد من "مؤثرين في 2021". شوفوا باقي الليست واعرفوا أكتر من قناتنا على يوتيوب.