انا الاديب و انتم ادرى

الشيخ امام عيسى ... اصل الحكايه ان بهيه .. مدبوحه .. و بتدفع ديه .. يا مصر هاتعيشى مطيه .. اذ يحكمك دبوره و كاب ........... الكلمات .................
أنا الأديب وأنتم أدرى
وعاشق الناس والخضرة
لا عمري طبلت ف حضرة
ولا قلت حاضر للنصاب
الله الله يا بلدى ولا كنا صحاب
*******
خاين ولا حد يجيرو
زي الكلاب يلقى مصيرو
قتيل وفايت فينا غيرو
ماشيين وف نفس السرداب
الله الله يا بلدي مخبر ع لباب
*******
سلام مربَّع للجرانين
فارشين صور تحت العناوين
سينا اللي راجعة عريسها عنين
وأغلب المعازيم عزَّاب
الله الله يا بلدي والكل كلاب
*******
آدى السلام ولا بلاشى
سينا اللي مدفع مافيهاشى
بالأمر جيش ما يروحهاشي
حطولها قفل ورَزة وباب
الله الله يا بلدى والأرض خراب
*******
مشوا الجيوش مشية وِزَّة
ترقص وعقبى ليوم غزة
اشرب وح يجيبو المزَّة
من أورشليم فستق وكباب
الله الله يا بلدي والعيشة هباب
*******
محلى السلام بطَّل كلاكيع
ممنوع كلام ضد التطبيع
علشان ما يلحق نفسو يبيع
أحلامنا يا حلاوة الأحزاب
الله الله يا بلدي شوفو الكذاب
*******
أصل الحكاية أن بهية
مدبوحة وبتدفع ديه
يا مصر ح تعيشى مطية
إذ يحكمك ضبوره وكاب
الله الله يا بلدي سنو الأنياب