Рет қаралды 353,366
Бәріңізге ассалаумағаликум. Бұл шығарылымда астанадағы не қазақ емес, не орыс емес ұрпақ тәрбиелеп жатқан аралас мектептер жайын, таза қазақ мектептеріне тоқалдан туған бала сияқты қарайтын екіжүзді елорда билігі туралы айтамыз. Жарты патшалық құрып алған Нұр-Сұлтан қаласы әкімдігінің шу көтерген өзге ұлт өкілдерінен қорқып қазақ мектептерін ашуға құлықсыз танытқан ұятты тірлігін көрсетеміз. Мемлекеттік тілге жанашыр, қазақ тілінің болашағына алаңдайтын әрбір көрермен видеоны соңына дейін көреді деп ойлаймыз. Себебі, басқа, басқа емес, бас қаладағы тілімізді сонша қор қылған, қазақ балаларына көзаларта қарап, бөліп-жаратын шенділер жайлы айтамыз. Дерек пен дәйектерді ашық, анық тізіп шығамыз! Мұны сізге білген дұрыс.
Қазақстан Тәуелсіздігінің 30 жылдығын алақайлатып айтып-ақ, жатырмыз. Кеңестен көрген қорлығымызды жырдай ғып, еңірегенде етегіміздегі жасқа кеме жүздіреміз! Жаһандану деген жалмауыз желкемізде төніп тұр. Ресейдің мемлекеттік думасының депутаттары әлсін-әлсін «қазақ деген ел болмаған, оларда жер де жоқ» деп доңызайбат шегіп қояды. Құлағымызды қағып тастап, алға шұлғи басып жүрген боламыз. Иә, дәл осылай ашына сөйлеп, ақиқатын ақын, Қазақстанның еңбек сіңірген қайраткері Дәулеткерей Кәпұлы әлеуметтік желідегі парақшасында жазды. Қоғамның түрлі түйткілдеріне бей-жай қарай алмайтын айтыскер бұл жолы елордада әкімі Алтай Көлгіновке дат айтып, таза қазақша мектептердің мүшкіл халын жеткізді. Ендеше ақынның ашынып айтқан әңгімесін сіздерге сөзбе-сөз баяндауды жөн көрдік.
Нұр-Сұлтан қаласында қазіргі таңда 36 қазақ мектебі, 53 аралас мектеп, 18 таза орыс тілінде білім беретін мектеп бар. Аралас мектептерде оқитын балаларды автоматты түрде орыс мектебінің түлектері деп санауға болады. Ал енді аралас мектептер қаланың қақ ортасында, жаңадан салынған, жағдайлары өте жақсы ғимараттарда орналасқан. Таза қазақ мектептерінің көбі шетпұшпақтаған, қаланың ана шеті, мына шеті, итөлген мекендерде ғана ашылған. Яғни, арзан пәтер жалдаған, базар жағалаған жарлы-жақыбайлар мен әр облыстан көшіп келіп, әлі бұл қалаға сіңісті бола алмағандардың мекені. Аралас мектептер қаланың ең көрікті жерлерінде, бай-бағландардың, басшы, қосшы, шенеуніктердің май кекіріп жатқан сүйікті аумақтарында орналасқан. Олардың балалары аралас не орыс мектептерінде оқиды. Себебі, мемлекет саясатының астарын да, бүгінгі бағыт-бағдарын да көріп, сезіп отырған жаңа қазақтар балаларын орысша оқытады. Өйткені қазақ тілінің болашағына ата-аналары да сенбейді!
Осы ретте Дәулеткерей Кәпұлы жергілікті билікті қатаң сынға алды. Былықтың бастауында ұлттық идеологияның жоқтығы, жалтақ саясат, теріс көзқарас тұрғандығын жеткізді. Біздің мемлекеттің «мәсінің қонышын кесіп кебіс қылған» қожанасыр саясатын қараңыз! Қалалық білім басқармасының бір шаруасына Білім және ғылым министрлігі араласа алмайды! Әкімдік - жарты патшалық! Ол аз десеңіз, қаланың білім басқармасына қарамайтын Назарбаев зияткерлік мектептері, жекеменшік мектептер қазақ тілінің көсегесін көгертіп отыр дей аласыз ба?! Осы жақында ғана Нұр-Сұлтанның қақ ортасында ашылған 89, 91-шы мектептерді қала әкімі Алтай Көлгінов ашты, олар да аралас! 92-ші мектепті аралас жасамақ.
Дәл осы жерде ақын бас қаласының басшысы Көлгіновке үндеу тастады. Алтай мырза, қазақ мемлекетінің болашағына балта шаппау керек және ол балта Болашақпен оқып келген азаматтың қолымен шабылмауы керек! Кешегі жоқ дегенде Қараөткелде орыстың қамалын қиратқан Кенесарының аруағынан ұялу керек қой?! Мына қаладағы білімнің ара салмағын көріп-біліп отырған әр адам Қазақ тілінің болашағын қалай елестететінін мен білмеймін. Қазақстаннан орыс бастатқан өзге ұлттар көшіп жатқаны қайда, неге саны азаймайтын орысша және аралас мектептер?! Ата-аналарда жалғыз мақсат - ақша табу, өлместің күні. Күнін әрең көріп отырған адам баласын іргесіндегі орыс немесе аралас мектепке бермегенде қайтеді?! Мемлекеттің идеологиясы әдірам қалған заман болып тұр! Әркім өз отырған жұмсақ креслосына ғана мығым. Бір мектепті таза қазақша жасайын десе «екі адам орысша жасамадың» деп шу көтереді екен деп, шуымызды сүйретіп, басымызды шұлғып, аралас жасай салғанда құда да, құдағи да тыныш! Соған мәзбіз, мектепті қатырып салып, ашып жатырмыз, мазмұнында, келешегінде шаруамыз жоқ, «сен тимесең мен тимен бадырақкөз» саясаткерлерміз!