"Нанға талас". Адамдарға не болған?

[@tengri-yoga3447]

Қәзір әлеуметтік желілерде "нанға талас" деген бір дерт пайда болды халқымызда. Білмеймін, бұрын ондай жағдай болды ма. Болса, болған да шығар. Бірақ, қәзір бізді қызықтыратын өткен заман емес, қәзіргі заман. Ал қәзіргі заманда еліміздің әрбір қаласында болып жатқан келеңсіз жағдай бар. Ол жағдайды шартты түрде "нанға талас" деп атайық. Оның мәнісі мынада: қандай болмасын бір шарада тегін бір нәрсе үлестіреді. Ол жарнама ретінде, немесе бір мейрамға байланысты болуы мүмкін. Мысалға жақында Атырау қаласында Наурыз мейрамына байланысты шарада жергілікті халық тегін тамаққа қызыл кеңірдек болып, елде нан біткендей таласты бірін-бірі жұлып. Өкінішке орай, мұндай келеңсіз жағдайлар әрбір өңірде болуда. Алдында астанамызда тап осылай тегін гүлге таласып, қалада үлкен кептеліс болды. Ұлт намысы үшін, жеріміз үшін былай шығып, қырылмайды ешкім. Ал тегін нәрсеге дым көрмеген малдай қырылысады. Өте бір сүйектен өтетін жағдай. Ал енді тек диванда отырып алып, тек құр сыншылдықпен айналыспай, осы мәселені шешу үшін нақты әңгіме де қозғайық. Жалпы, осы құр сыншылдықтан да арылғанымыз абзал. Сынайсың ба, бірден шешімін де айт. Шешімің жоқ па, бір жеріңе ие болып отыр. Ал "нанға таластың" шешіміне келсек, менің ойымша, таласатындардың толық бейнесін түсіріп, кім екенін мүмкіндігінше анықтап, бүкіл жерге жария ету керек шығар. Әсіресе, солардың тұратын, жұмыс істейтін жерлерінде ағайындарына жіберіп, масқарасын шығару керек деп ойлаймын. Немесе, аттарын анықтамай-ақ, суреттерін бүкіл желілерде таратса, бұл кісілер еліміздегі ең мұқтаж адамдар деп мысалға. Негізі, бұрыннан байқағанмын. Кейбір өңірлерде адам қайтып, оған ас бергенде, қалған тамақты тарататын жерлер бар. Сол жерлерде ақ бастарымен шал-кемпірлер таласып қалатынын талай өз көзіммен көргенмін. Сондықтан, бұл мәселені шешу қиынға соғары сөзсіз. Бірақ, дегенмен шешу керек. Әйтпесе болмайды ағайын!