Ներքին Խնձորեսկում խնդիրների պակաս չկա

Ներքին Խնձորեսկ գյուղը գտնվում է անմիջապես Ադրբեջանի սահմանի հարևանությամբ: Այստեղ մարդիկ ապրում են առանց գազի, ինտերնետը և հեռախոսակապը թույլ է, ասում են, որ այդ ամենին նպաստել է գյուղի սահմանամերձ դառնալը:
Բնակիչները մտահոգությամբ են խոսում գյուղի խնդիրների մասին, ամենաառաջնայինը համարում են ճանապարհների հիմնանորոգումը: Ասում են, որ մեկ տարի է, ինչ հաստատված է բարեկարգման ծրագիրը, բայց դեռևս շինարարությունը չի սկսվել, ոմանք անգամ թերահավատ են, թե երբևէ այն կբարեկարգվի։
«Երբ զանգում ենք շտապօգնություն, հրաժարվում են գալ, ասում են՝ հիվանդին դուք տեղափոխեք, եթե շտապ չէ»,-դժգոհում են բնակիչները։
2022 թվականին Ներքին Խնձորեսկում կառուցված բնակելի տներից մեկում է ապրում արցախցի Հարություն Չափողանցի ընտանիքը:
Հարությունը մեծ դժվարությամբ բենզին գտնելով, կնոջ և հինգ անչափահաս երեխաների հետ սեպտեմբերի 26-ին Արցախից հասել է Գորիս: Տեղահանվել են Ասկերանի շրջանի Պատարա գյուղից, բնակություն հաստատել սահմանամերձ Ներքին Խնձորեսկում ասում է, որ ընտրել են գյուղը, որովհետև քաղաք չենք սիրում, գյուղի առօրյան ավելի լավ է, ապրելը՝ հեշտ:
Այնուամենայնիվ խնդիրների պակաս չկա։ Մեկ ամիս է, հոսանք չունեն, դիմել են էլեկտրոցանցին, ասել են այդ հարցով պետք է “John and Hasmik Mgrdichian” հիմնադրամը զբաղվի: Փայտի վառարանը դրած է բակում, որտեղ և ճաշ են պատրաստում։ Հինգ երեխա ունի՝ չորս տղա մեկ աղջիկ, հոսանք չունենալու պատճառով երեխաները մոմի լույսի տակ են դաս սովորում: