Рет қаралды 25,068
နိုင်ငံတကာ ရေပိုင်နက်ထဲ တရုတ် တိုက်ချင်းပစ်ဒုံးကျည် ပစ်ခတ်ခြင်းရဲ့ နောက်ကွယ်မှာ
တရုတ် ပြည်သူ့လွတ်မြောက်ရေးတပ် (PLA)ရဲ့ ဒုံးကျည်တပ်ဖွဲ့ဟာ အများမျှော်လင့်မထားတဲ့ အခြေအနေ တစ်ခုအဖြစ် နိုင်ငံတကာ ရေပိုင်နက်ထဲကို တိုက်ချင်းပစ်ဒုံးကျည် (ICBM)တစ်စင်း ပစ်ခတ်လိုက်ပါတယ်။ စက်တင်ဘာ ၂၅ ရက်နေ့က ပစိဖိတ် သမုဒ္ဒရာထဲကို ICBM ပစ်လွှတ်ခဲ့ခြင်းဟာ PLA ဒုံးကျည်တပ်ဖွဲ့ရဲ့ သမားရိုးကျ လုပ်ထုံးလုပ်နည်းတွေနဲ့ တော်တော်ကြီး ကွဲလွဲနေတာ အမှန်ပါပဲ။ ဒေသတွင်းမှာ တခြားနိုင်ငံ တချို့နဲ့ တင်းမာမှုတွေ ရှိနေချိန်၊ အမေရိကန်နဲ့ အားပြိုင်မှုတွေ မြင့်တက်နေချိန်မှာ အခုလုပ်ရပ်ဟာ တွေးစရာတွေ အမျိုးမျိုး ဖြစ်စေခဲ့တာတော့ အမှန်ပါပဲ။
ပြီးတော့ PLAရဲ့ ဒုံးကျည် တပ်ဖွဲ့ ဆိုတာဟာ နိုင်ငံရဲ့ နျူကလီးယား စစ်လက်နက် အရင်းအမြစ်တွေကို ထိန်းသိမ်းထားတဲ့ အင်အားစု ဖြစ်ပြီး ဖွဲ့စည်းပုံအရ အရမ်းအရေးပါပေမယ့် ပြီးခဲ့တဲ့ လပိုင်းတွေအတွင်း အရာရှိတွေရဲ့ အဂတိ လိုက်စားမှုလို ပြဿနာတွေကြောင့် သိက္ခာကျစရာ အခြေနေတွေကို ဖြတ်သန်းခဲ့ရတယ်။ ဒီတော့ စက်တင်ဘာ ၂၅ ရက်နေ့ ICBM ပစ်ခတ်မှုဟာ ပြည်ပ အားပြိုင်မှုတွေနဲ့ ပတ်သက်ပြီး အင်အားပြတာရော၊ ပြည်တွင်းမှာ စိတ်ဓာတ်ရေးရာ မြှင့်တင်တာ အတွက်ပါ ရည်ရွယ်ထားတဲ့ အခင်းအကျင်း တစ်ခုလည်း ဖြစ်နိုင်ပါတယ်။
နိုင်ငံတကာ စစ်ရေးသုတေသီတွေ အံ့ဩကြတဲ့ အဓိက အချက်ကတော့ ICBM စမ်းသပ်ခြင်း ဆိုတာထက်၊ နိုင်ငံတကာ ရေပြင်ကို ချိန်ရွယ်ပြီး စမ်းသပ်ခဲ့ခြင်းကြောင့် ဖြစ်ပါတယ်။ တရုတ်ဟာ ၄၄ နှစ်ကျော် ကြာတဲ့ထိ၊ တိတိကျကျ ပြောရရင် ၁၉၈၀ ပြည့်နှစ်၊ မေလနောက်ပိုင်း နိုင်ငံတကာ ရေပိုင်နက်ထဲ ICBM ပစ်ခတ် စမ်းသပ်တာမျိုး မရှိခဲ့ပါဘူး။ ဒါဟာ တရုတ်က နျူကလီးယားထိပ်ဖူး တပ်ဆင်နိုင်တဲ့ စစ်လက်နက်တွေကို လုံးဝ မစမ်းသပ်ခဲ့တဲ့ အဓိပ္ပါယ် မဟုတ်ပါဘူး။ အဲဒီကြားကာလအတွင်း ICBM စမ်းသပ်မှုတွေကို တရုတ်ဟာ နိုင်ငံပိုင်နက်ထဲ၊ အထူးသဖြင့် ရှင်းကျန်းဒေသက သဲကန္တာရထဲမှာပဲ အဓိက လုပ်ဆောင်ခဲ့ပါတယ်။ ဒါဟာ စစ်ရေးနည်းပညာနဲ့ ပတ်သက်ရင် သိုသိပ် လျှို့ဝှက်ချင်တဲ့ PLAရဲ့ သဘောထားကြောင့်လည်း ဖြစ်နိုင်ပါတယ်။
ဒီတော့ အခုလို နောက်ခံအခြေအနေတွေ ရှုပ်ထွေးနေတဲ့ ကာလမှာ PLAရဲ့ ဒုံးကျည်တပ်ဖွဲ့ဟာ မူလစံနှုန်းတွေကနေ ဖယ်ခွာပြီး ပစိဖိတ် သမုဒ္ဒရာထဲ ICBM ပစ်လွှတ်လိုက်တဲ့အခါ သဘောတရားဆိုင်ရာ မေးခွန်းတွေ ထွက်ပေါ်လာပါတယ်။ စင်ကာပူ အခြေစိုက် ရာဂျာရက်နမ် နိုင်ငံတကာ လေ့လာရေးကျောင်းရဲ့ အကြီးတန်း သုတေသီ တစ်ဦးဖြစ်သူ ဒေါက်တာ ဘားနတ်ဒ်လူးကတော့ ထိုင်ဝမ်အရေးနဲ့ ပတ်သက်လို့ အမေရိကန်နဲ့ တင်းမာမှုတွေ မြင့်တက်လာချိန်မှာ တရုတ်ဟာ နျူကလီးယား လက်နက် စွမ်းရည်ကို ထုတ်ပြလာတာလို့ မှတ်ချက် ပေးခဲ့ပါတယ်။ တရုတ်က ပစ်လွှတ်ခဲ့တဲ့ ICBMဟာ နျူကလီးယား ထိပ်ဖူးတပ်ဆင်နိုင်ပေမယ့် စမ်းသပ်မှုမှာတော့ ထိပ်ဖူးအတု တစ်ခုကို အစားထိုးထားတာ ဖြစ်ပါတယ်။
ဒေါက်တာလူးက တရုတ်ဟာ သူတို့ရဲ့ ဒုံးကျည် စွမ်းဆောင်ရည်ကို အကဲဖြတ်ရုံ သက်သက်ဆိုရင် နိုင်ငံတကာ ရေပိုင်နက်ထဲ လူသိရှင်ကြား ပစ်လွှတ်ပြစရာ အကြောင်းမရှိဘူးလို့ ထောက်ပြခဲ့ပါတယ်။ အခုရက်ပိုင်းအတွင်း တရုတ်ရဲ့ နည်းပညာပိုင်းဆိုင်ရာ ထုတ်ကုန်တွေကို လုံခြုံရေး အကြောင်းပြချက်နဲ့ တင်သွင်းခွင့်ပိတ်ဖို့ အမေရိကန်က ပြင်ဆင်နေတာကြောင့် နှစ်ဖက် ဆက်ဆံရေး ပိုမို တင်းမာနေချိန်မှာ အခုလိုမျိုး အမေရိကန် ရေတပ် အားကောင်းရာ ပစိဖိတ် သမုဒ္ဒရာ ရေပြင်ဆီ တရုတ်က ICBM ပစ်ခတ်ပြိလိုက်တာဟာ အရမ်းရိုးရှင်းတဲ့ တိုက်ဆိုင်မှုတော့ မဟုတ်လောက်ဘူးလို့ သူက ဆိုတယ်။
ထိုင်ဝမ်နိုင်ငံ၊ ထိုင်ပေမြို့ အခြေစိုက် မဟာဗျူဟာ လေ့လာရေးဌာနရဲ့ သုတေသီ ဒေါက်တာ ချန်ချင်ကတော့ PLA ဒုံးကျည်တပ်ဖွဲ့ဟာ လှောင်ပြောင်စရာ အရှက်တကွဲ အခြေအနေတချို့ ကြုံတွေ့ခဲ့တဲ့နောက် တကယ်တမ်း သူတို့ရဲ့ တိုက်ခိုက်ရေး စွမ်းရည်ဟာ လျှော့တွက်လို့ မရဘူး ဆိုတာမျိုး ကမ္ဘာသိ ပြသတာလည်း ဖြစ်နိုင်တယ်လို့ မှတ်ချက်ပေးခဲ့ပါတယ်။ ပြီးခဲ့တဲ့ နှစ်ပိုင်းတွေမှာ ဒုံးကျည်တပ်ဖွဲ့ရဲ့ မဟာဗျူဟာ တိုက်ခိုက်ရေး ဒုံးကျည်ပစ်စင်တွေဟာ တကယ်တမ်း အလုပ်မလုပ်တာမျိုး ကိစ္စတွေကြောင့် သိက္ခာကျခဲ့သလို အဂတိလိုက်စားမှု တိုက်ဖျက်ရေး ခေါင်းစဉ်အောက်မှာ တပ်ဖွဲ့ရဲ့ ထိပ်တန်း ဗိုလ်ချုပ်တွေ ဖယ်ရှား ရှင်းလင်း ခံခဲ့ရပါတယ်။ အတည်ပြုဖို့ ခက်ပေမယ့် အမေရိကန် ထောက်လှမ်းရေး အရာရှိ တချို့ရဲ့ အဆိုအရ ဒုံးကျည်ပစ်လွှတ်မယ့် လောင်စာဆီတွေအစား ရေတွေထည့်ထားတာကို စစ်ဆေးတွေ့ရှိလို့ သမ္မတ ရှီကျင့်ဖျင်တစ်ယောက် ဒေါသပေါက်ကွဲခဲ့တယ်ဆိုတဲ့ ကိစ္စမျိုးတွေလည်း လူပြောများခဲ့ပါတယ်။
အဲဒီလို အပြောအဆိုတွေကို တိတိကျကျ ချေဖျက်ဖို့ဆိုရင် နိုင်ငံတကာ ရေပိုင်နက် တစ်နေရာကို ICBMတစ်စင်း ပစ်လွှတ်ပြခြင်းထက် ပိုကောင်းတဲ့ ဖြေရှင်းမှု နည်းလမ်း မရှိပါဘူး။ ICBMအဆင့် သတ်မှတ်ခံထားရတဲ့ တာဝေးပစ် ဒုံးကျည်တွေ ဆိုတာဟာ အနည်းဆုံး ကီလိုမီတာ ၅၅၀၀ လောက် ခရီးပေါက်အောင် ပျံသန်းနိုင်ပါတယ်။ တရုတ် ပြည်မကြီးကနေ ပစ်ခတ်မယ်ဆိုရင် ထိုင်ဝမ်ကျွန်းကို အသာလေး လက်လှမ်းမီရုံသာမက အမေရိကန် ပိုင်နက်တချို့ကိုပါ ရောက်ရှိနိုင်တဲ့ အဓိပ္ပါယ်လည်း ဖြစ်ပါတယ်။
တစ်ဖက်က ကြည့်ရင်လည်း သဘောထားရေးရာ ရှုထောင့်မှာ တရုတ်အတွက် စွန့်စားရင်းနှီးရတာမျိုးတွေ ရှိနိုင်ပါတယ်။ လောလောဆယ်မှာတောင် အမေရိကန် အပါအဝင် အနောက်မဟာမိတ် နိုင်ငံတွေနဲ့ တင်းမာမှုတွေ ရှိနေရာမှာ ဒီလို ICBM စမ်းသပ်မှုက ဆက်ဆံရေးတွေ ပိုမို ခါးသီးသွားစေနိုင်တာကြောင့်ပါ။ ပြီးတော့ တရုတ်ရဲ့ ဩဇာဖြန့်ကျက်မှုနဲ့ ပတ်သက်လို့ စိုးရိမ်နေတဲ့ တောင်တရုတ်ပင်လယ် ဒေသတွင်း နိုင်ငံတွေ၊ ဂျပန်နဲ့ တောင်ကိုရီးယားတို့လို ပြိုင်ဘက်တွေကလည်း တရုတ်ဟာ ပိုရန်လိုလာတဲ့ အဓိပ္ပါယ်လား ဆိုတာမျိုး ဆန်းစစ်လာကြမှာ ဖြစ်ပါတယ်။ နိုင်ငံတကာ အခင်းအကျင်းမှာ ပြိုင်ဘက်တွေနဲ့လည်း စီးပွားရေး၊ သံတမန်ရေး ထိတွေ့မှုတွေ လိုအပ်နေတဲ့ အခြေအနေမှာ ဒီကိစ္စမျိုးက တရုတ်အတွက် ကောင်းမွန်တဲ့ ကိစ္စတော့ မဟုတ်ပါဘူး။
#ludunwayoo #လူထုနွေဦး #NewsUpdate
𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 - / @peoplespring
𝗙𝗮𝗰𝗲𝗯𝗼𝗼𝗸 - / ludunwayoo
𝗪𝗲𝗯𝘀𝗶𝘁𝗲 - www.ludunwayoo...
𝗜𝗻𝘀𝘁𝗮𝗴𝗿𝗮𝗺 - / ludunwayoo
𝗧𝗲𝗹𝗲𝗴𝗿𝗮𝗺 - t.me/peoplespring