Novruz karvanı yola çıxdı

Bakıda “İlaxır çərşənbə” təntənəli şəkildə qeyd edilir.
Novruz personajları - Kosa, Keçəl, Dədə Qorqud, Bahar qızının daxil olduğu karvan süvarilər, faytonların müşayiəti ilə Bakının əsas tonqalını alovlandırmaq üçün səhər saatlarında şəhərin mərkəzindən yola düşdü.
Bayram karvanı Bakı Şəhər İcra Hakimiyyətindən hərəkətə başlayaraq İstiqlaliyyət küçəsi ilə Heydər Əliyev Sarayının yanından keçməklə, Bülbül prospekti, Xəqani, Nizami küçələri ilə Xətai heykəli və fəvvarənin yanından keçib, Heydər Əliyev prospektinə çıxdı, metronun “Koroğlu” stansiyasının qarşısından keçməklə Hava limanı avtomagistralı ilə hərəkət edərək Suraxanı “Atəşgah”ına yola düşdü.
“Atəşgah”dan od götürən bayram karvanı geriyə qayıtdıqdan sonra Mərkəzi Parkda bayram tonqalı alovlandırılacaq və Dədə Qorqudun Novruz xeyir-duası ilə saat 19-da incəsənət ustalarının iştirakı ilə bayram konserti və atəşfəşanlıq olacaq.