انثى بالكامل (البنية) شمت محمد نور محجوب شريف

شنو الخلاك
تبقي كتابةً وشفاهةً
بتاً في سماها علم
قلم في ايدا ياتو قلم
قلم يشفيك مما فيك
اذا كتم الحقيقه الم
صريحه صراحه، بل لماحه
تفهمها طايرة..
مابتلقاها في سكة مذمة ونَم
قلم مابزيل بلم في رايا حبره سراب
وسيده اقل حاجه ظلم
مابتقدر عليها تفوتها
مامسنودة بجبروتها
ولا مالاً معاه بيوتها
هيبتها بس
وبعضاً من كلامها سكوتها
ما تعمل مهم
حتجيها تستناها في مكتب تحت قسمها
ديك اللافته داك اسمها
بصمتها بسمتها ورسمها
وضوح الشمس لو تعمل عمل ختمها
كذلك انثي بالكامل
بسيطة بساطة مرموقة
وبين الرفعة والعادية ما بتحسها الفرقة
بين الشاشة والمقشاشة تلقى كتابها
والهبابة والهتفون
تكيه لطيفه جنب اللون
وبحة سهر حلق قلمها
تغمد ياخي كي ترتاح
يرفرف في الصباح علمها
وفي الافراح..
وفي الاتراح..
بتتحزم وتتلزم تحت كانونها حتي رمادو يتحتا
حتي الخته والنسوان بتعرف بابن السري
وسط جاراتها بتجامل
تزور الحاجه والحامل
وتتونس مع البنوت ضحى الجمعه
عن الحريه والسمعه
عن الصبغه اللي بتسبب فشل كلوي
بتتونس مع البنوت ضحى الجمعه
عن الستره اللي بتخلي الحلم ممكن
حبيبها تختو في الصوره
ومابتخلي في جواها إن
وحاجة مصرورة
خريطة بسيطة في العالم
حرف نقط وماسورة
تري الفانونس وما النجفه
اذا ما اللمبه مكسوره
تعرف الكمده بالرمده
والله يكضب الشينه
تختها في الجرح يبرا
سمح توبا وسند عمه
وهمه تدرج العاطل
إذا ما الوالد استنجد ترسل ليه ود عينا
تساعد امها تشكل
تلبس ناس وبتأكل
محل ماتمشي بتشكل اهميه
قلم ما فيه انفاس الحياه اليوماتي اميه
شنو الخلاك
شفاهة وكتابةُ
بتاً في سماها علم