โฮมบุญโฮมศรัทธาบูชาปราสาทรวงข้าว วัดราชวารี อ.จตุรพักตร์พิมาน จ.ร้อยเอ็ด

[@channel-ut3ne]

ม่วนดีครับผม…..ชื่นชมครัาบ❤❤

[@toey_yutthan]

โฮมบุญโฮมศรัทธา บูชาปราสาทรวงข้าว วัดราชวารี ต.โคกล่าม อ.จตุรพักตร์พิมาน จ.ร้อยเอ็ด (ผญา) พี่น้องเอ้ย ประเพณีฮีตเค้าเฮาสานก่อบ่ลืมหลง ยึดถือคงทำมาฮอดความเดี่ยวนี้ พอเดือนยี่มาเถิงบั้นบริพันเตรียมแต่ง พากันแปงสืบสร้างคูณข้าวใส่ลาน เอ้เป็นปราสาทนั้นงามดั่งเมืองพรม ระลึกองค์แม่โพสพผู้ล่ำแยงคอยเลี้ยง มีที่เดี่ยวดอกเด้อท่านปราสาทข้าวเหลืองทองทรงหอโหวดงามเด่น ประเพณีฮีตบ้านมาสานสร้างไว้อยู่ยืนนี่แหล่ว (เพลง) งามดั่งแสงเฮืองฮอง ศรัทธาทั้งผองแซ่ซ้องโมทนา ฮีตเก่าสร้างสรรค์กันมา เป็นพุทธบูชาพระสัมมาโพธิญาณ สืบสานเป็นประเพณี ร้อยเอ็ดเฮามีปราสาทข้าวงามตระหง่าน สืบทอดจนฮอดลูกหลานตกแต่งเตรียมงานเอาบุญบ้านเฮา ชาวบ้านร่วมแรงร่วมใจ อยู่ใกล้หรือไกลต่างโฮมโมทนา ฮวงข้าวเอามาใส่ต่าโฮมอยู่ศาลามัดสานช่วยกัน แบ่งปันเครื่องของมาให้บ่งบอกน้ำใจชาวไทโคกล่าม ถิ่นอำเภอจตุรพักตร์พิมาน สถานถิ่นงานวัดราชวารี มื้อดีมื้อศรีมงคล สำเร็จเสร็จผลเลิศล้ำงามตา เฮืองฮองเรืองรองงามสง่า ด้วยแรงศรัทธาชาวบ้านซ่อยกัน บริพันธ์ข้าวเหนียวข้าวจ้าว ปราสาทรวงข้าวทรงหอโหวดงามดี ต่อยอดเป็นประเพณี มาเบิ่งของดีไทบ้านโคกล่าม เฮืองฮองส่องไสวเรืองงาม สีทองอร่ามงามตาตรึงใจ (ลำพื้น) ขันดอกไม้บายศรีเอ้แต่งแซมดวงดอกไม้โยงฝ้ายจ่องโฮม งามเลิศล้นแม้นมิ่งสรรพสรรอัศจรรย์แฮงหลายแม่นไผมาพ้อ ยอขันห้ามาลาสูตรส่งมงคลเลิศล้วนถวยน้อมพุทธองค์ คงต่อไว้ในพุทธศาสนาอีกประการนี้หนาบูชาแม่เจ้า… (ลำวง) ปราสาทข้าวถวยเจ้าแม่โพสพ ด้วยความเคารพเลี้ยงดูเรื่อยมา หนึ่งเม็ดข้าวเลี้ยงเหล่าชาวประชา เกื้อกูลชีวาคุณประโยชน์มากมี ศรีๆขอเชิญขวัญข้าว พี่น้องหมู่เฮาเอาบุญยิ่งใหญ่ สูตรเชิญมงคลทั้งหลาย งามเลิศวิไลโฮมไปมื้อบุญ ค้ำจุนบุญคุณของข้าว ขอนอบน้อมเอาเป็นมหามงคล ล้ำเลิศบังเกิดเป็นผล ดีงามประเสริฐเลิศล้น ศรัทธาผู้คนยอน้อมวันทา…. (ตังหวาย) โอ่น้อ ประเพณีน้อละแม่นฮีตเค้า ศรัทธาเฮายึดถือหมั่นแก่น คนทั่วแดนศรัทธายอย้อง เป็นฮีตคองเฮาเฮ็ดสืบมา หนาคนฟังเอ่ย… นี่น้อ ภูมิปัญญาแต่เดิมดาตั้ง หมู่เฮายังสืบสานกันต่อ นี่ล่ะพ่อปราสาทฮวงข้าว งามเด่เจ้าผู้คนยอย้อง เสพสลองแห่แหน… ท่านเอ่ย เสียงพิณแคนสนองม่วนซื่น ตกยามคืนฟังลำเกินม่วน ขอเชิญชวนมาแว่มาเล่น คันเห็นแล้วสิสุขดั่งใจ บุญยิ่งใหญ่บ้านเมืองเฮาหนา ฮักษาสืบสาน….. (เพลง) วัดราชวารีจัดบุญประจำปียิ่งใหญ่ตระกาล จตุรพักตร์พิมาน เมืองร้อยเอ็ดขอเชิญแวะเวียน ส่องแสงเรืองรองปราสาทสีทองรวงข้าวร้อยเรียง ปราสาทข้าวหอโหวดที่เดียว เชิญเด้อมาเที่ยวกราบไหว้บูชา…. (เต้ย) ศรัทธาเอาบุญโฮมตั้ง(ซ้ำ) เฮ็ดบุญคูณลานจัดงานยิ่งใหญ่บั้งพลุตะไลจุดถวยนอบน้อม เพียมพร้อมพร่ำถวาย งามหลายเด่นางรำนางฟ้อน (ซ้ำ) จั่งแม่นสะออนกลองยาวฟ้อนแห่ ผู้เฒ่าผู้แก่มาโฮมต่อตั้ง ต้อตั้งน้อต่อตั้งต่อตั้ง คันหวังสร้างแม่นกุศล งามสวยน่ายลปราสาทรวงข้าว ขอเชิญมวลเจ้ามาเอาบุญแห่ มาหลิ่งมาแลเอาบุญเด้อ…..