IKOMPLI L-KAŻ DWAR L-INKJESTA VELLA

ONE.COM.MT • Se ngħaddu issa biex insegwu ġabra ta’ aħbarijiet mill-awli tal-Qorti.
KITBA: NOLAN CAMILLERI
FILMAT: ARKIVJI
Illum issoktat il-kumpilazzjoni fil-konfront ta’ numru persuni u kumpaniji b’rabta mal-inkjesta tal-Maġistrat Gabriella Vella. Fil-fatt, quddiem il-Maġistrat Leonard Caruana xehdu diversi spetturi li kienu involuti fl-investigazzjonijiet u r-reġistratur tal-Qorti.
Fost l-oħrajn, xehed l-ispettur Wayne Rodney Borg, li assista fl-investigazzjonijiet tal-Maġistrat u fit-tfitxxija li saret għand Steward Healthcare. Hu kkonferma li wara li l-Pulizija rċevew ir-rapporti tal-Awditur Ġenerali ttieħdet id-deċiżjoni li l-Korp ma ħassx il-bżonn li jinvestiga.
L-Ispettur Ryan Stivala u l-eks Spettur Anthony Scerri wkoll xehdu dwar it-tfittxijiet li assistew għalihom f’postijiet differenti, b’dan tal-aħħar intalab jirreferi għal lista ta’ persuni t’interess, iżda twaqqaf wara talba tal-Prosekuzzjoni fid-dawl li l-lista kienet ta’ noti personali.
Ir-Reġistratur tal-Qorti, Franklin Calleja, li ntalab jikkonferma min kienu l-esperti tal-Qorti, qal li ma rax dokumenti li jindikaw kif ġew mqabbdin tali sperti.
Il-każ ġie aġġornat għat-tnejn ta’ Lulju li ġej.
MILQUGĦA TALBA TA’ SCHEMBRI U MIZZI
L-imħallef Edwina Grima laqgħet it-talba tad-difiża għan-nom ta’ Konrad Mizzi u Keith Schembri b’rabta mal-ordni tal-iffriżar li ġiet imposta fuqhom.
B’hekk issa se tkun Qorti Kostituzzjonali li se tiddeċiedi dwar il-fatt li d-difiża kellha biss ġimgħa biex twieġeb għall-ordni tal-iffriżar, filwaqt li l-prosekuzzjoni ma kinitx kostretta b’dan il-mod.
L-Avukat Ġenerali pprotesta kontra t-talba oriġinali tad-difiża u b’hekk l-ordni ta’ ffriżar tħalliet fis-seħħ.
L-Imħallef stqarret li jrid jinstab bilanċ bejn id-drittijiet tal-imputati u l-fatt li wieħed għandu jassigura li l-qligħ minn attivitajiet illegali m’għandhomx jibqgħu jiġu użati.
14-IL SENA ĦABS WARA LI PPROVA JOQTOL LIL MARTU
Roddy Switon Williams ta’ 44 sena mis-Seychelles intbagħat erbatax-il sena ħabs wara li ammetta li pprova joqtol lil matru.
Il-każ imur lura għal Ottubru tal-2017 meta r-raġel qafel lil martu f’kamra taħt l-art fl-inħawi tal-Bajja tar-Rinella.
Il-vittma kienet għamlet erbat ijiem maqfula f’għar fil-Forti Rikażli wara li kien tefagħha fil-baħar f’argument li kien inqala’ bejniethom.
Waqt li kienet maqfula, hi ġiet stuprata minn żewġha, li kien vjolenti magħha u ħadilha l-mobile u l-flus.
Minbarra li ġie kkundannat sentenza ta’ priġunerija effettiva, hu ġie ordnat iħallas tnax-il elf ewro fi spejjeż tal-Qorti.