Ортағасырлық Сарайшық қалашығында археологиялық қазба жұмыстары жүргізілуде.

Ортағасырлық Сарайшық қалашығына археологиялық қазба жұмыстарын ұйымдастыру Атырау облыстық тарихи-өлкетану музейіне тапсырылған болатын. Осыған орай 4 қыркүйектен бастау алған археологиялық қазба жұмыстары жалғасын табуда.
Қазіргі уақытта үстіңгі бөлігі 3000 кв м ашылды. Үстіңгі бөлігінен көптеген көрханалар анықталды. Көрханалардың көлемі 2,5 м х 3 м құрайды. Көрханалар күйдірілген кірпіштен тұрғызылған. Биіктігі 3 қатардан - 12 қатарға дейін сақталған. Көрхана тазартылып, көрханадан анықталған 2 және 8 жерлеу орнына дейінгі адам сүйектеріне антропологиялық зерттеу жұмыстары жүргізіліп жатыр. Табылған адам сүйектеріне антропологиялық зерттеулерді Ә.Марғұлан атындағы Археология институты физикалық антропология зертханасының меңгерушісі Р.Жанұзақ зерттеу үстінде.
Қазба жұмыстарының екінші мәдени қабаты материктен ортағасырлық үйлердің орны анықталды. Астыңғы бөлігі қазіргі уақытта 1200 кв м тазартылды. Кесінді қабаттар ашылып ортағасырлық 10 ға жуық тұрғын үйлер мен оларға қатысты шаруашылық аймақтар ашылып зерттелу үстінде. Бөлмелерде ортағасырлық тұрғын үйлерге тән пеш, тандыр орындары, суфа (ыспа) орындары сақталған.
Қазба жұмыстары кезінде орта ғасырлық күміс көмбе (100 ге жуық күміс монеталар), 50 ге жуық мыс монеталар. Қазба жұмыстары кезінде қыш ыдыс түрлері (құмыра, шәйнек, көзе, түбек, ыдыс қақпақтары), әр түрлі сырлы ыдыс бөліктері, шаруашылық мақсатта қолданылған қыш бұйымдар (шырағдан түрлері, құбыр, шығыр, сфераконус бөлігі, ау батырмалары, ұршық басы, тас қалып), сүйек бұйымдар (шүмек, өңделген сүйектер - ау тоқуға арналған сүйек түрлері, өңделген асық) әшекей түрлері (қола айна, қола айна бөліктері, шыныдан жасалған моншақ түрлері ) тб анықталды.