Pathian Thu Thawn Stress Kan Neh Thei Daan Ding - Uk Lian

#UkLian
#UklianSermon
#Uklian
Sermon Thupi: Is it normal for a Christian to have depression and mental health & how would you deal with it according to the Bible?
Himi hi (ECCMY Mino Sunday) ni ah minit 10 thusimnak in pekmi ih thupi in hrilsakmi asi.
Lungretheih Buainak (Stress) Tlun Ah Bawipa Thawn
Pathian nung kan zum ruangah kan (stress) donharnak le lungretheinak a hlo verver lo nan, tuar thiam daan kan thiam sawn. Leitlun ih kan damsung ahcun buainak le lungretheihnakpawl kan tong hrimhrim dingmi asi (John 16:33). Pathian in Amah kan zumnak cu, ziangtlukin a hnget timi theihnak ding khalah in hliahnak ah tuarnak hi in siang (1 Peter 1:6-7). Rah bawr ṭha le rah-ṭha kan rah theinak ding ahcun tuartheinak, Pathian zum hngetih Pathian thawn pehzomawknak nun kan ṭul.
Harsat tuar theilo, donharnak le lungretheihnak ih dungtolh le beidong men kan si ahcun lamzin kap ih a tlami thlaici, lungphek parih a tlami thlaici, hlingbuur lakih a tlami thlaici bangin rah ṭha kan rah thei dahlo ding. Pathian in kan tlin lo tiangtiangin harsatnak in pe dahlo timi khal kan thei (1Cor. 10:13). Zumtu hrangah hardamnak hi, Thlarau-lam pitlinnak ding hrang khalah a thupi. Dungthluntu John cun a cakuat pathumnak ah nan harhdamnak le ziangkim ah nan lam a a tluan theinak dingah thlacamnak ah ka lo bawm tiin (3 John 1:2) sungah ziangkim ah damcak a thupitnak a tarlang.
Kan zohthim dingah Bible sungah a phunphun in harsatnak a tuartu, lungretheihnak a tuartu le nautatnak a phunphun tuartu kan hmu thei. Jesuh kha, kan hrangah a phurrit phurhmi kha arak nasa tuk asi, a thlanhri formi hman thisen tiang a suak. Thuthangṭha a phuanmi mipi in an theithiam lo men siloin Amah ih a hril hleicemi a dungthlungtupawl hman in an theithiam lo. Paul khal, vuak-thawi a tuar, a taksa ah damlonak thawn le ninghang lungrethei in kum tampi caan a hmang ve. Job khal hi harsat tuar zet asi. Stress zawngin tah ding sisehla a stress level a sang zet ding, a taksa hma in khat, a neihmi pawl an cem theh ih, a fahniangpawlin an thihsan. Asinan, Pathian a rinsan thotho.
Tui kan dinhmun hnakih dinhmun sia Bible sungah tampi kan hmu thei. Asinan an tuarnak tlunah Pathian ah an hram an bun ih Pathian thawn pehzomnaknak ṭha an neih ruangah Pathian ih cahnak thawn an harsatnakpawl tuarsuak theiin, hmailam ah an feh vivo thei asi. A nasa sawnmi, a ropi sawnmi le ruah dingmi thupibik Pathian ih ṭhatnakpawl an ruah thiamnak ruangah lungretheihnakpawl an tuarsuak vivo thei ti khalin kan ti thei (Phi 4:8).
David ih nunnak khal kan zoh asile, stress tiih siar dingmi tampi kan hmu thei. A fapa in that dingin a hual ih, Saul khalin that dingin a duum. Esther khal a miphunpipawl cimit ding thu a theih tikah stress ih lak theih asi. Asinan, Pathian kutih tlukluh sawnnak a hril.
Thinharnak le donharnak lam hnakin ziangtin Bawipa rinsannak thawn in kan buainak kan neh thei ding timi ruat sawn ding kan si. Daniel cun, Pathian thiltitheinak hi a thei tuk. A thinharnak le a donharnakpawl cu ni khat vei 3 thlacamnak thawn Pathian hnenah a hlan. Pathian thawn an pehzomawk tikah, Pathian thawn an ṭangtlang. Pathian thawn a tangtlangmi minung cu thinharnak vek men ih neh theih an si nawnlo. Cutin, kiosa lak hmanah venhimnak a hmu. Joseph khalin, a tuarnak hi stress lam zawngin la ding sehla tawkfangnawn cu a nei ding ve nan, Pathian a rinsannak ruangah a tuahmi kipah Pathian in a thlawhsuah ih thinharnak le lungretheih tuarnak tlunah hruaitu ropi dinhmun tiangah Pathian in a khaisang.
Kan stress (donharnak le lungretheihnakpawl) kan Bawipa Jesuh in in phurh bawm thei. Anihcun zaangkhai ten in phurh sak ding. Asinan, kanmah in kan phurh le kan tuar pang asile kan hrang a rit tuk thei. Curangah Bawipai hnenah kan donharnakpawl thlen sawn uhsi. Colhnak hmun nuam, tiva kamah Bawipa thawn colh tlang thiam uhsi. Bawipa hnen ih colh cu lungdaihnak asiih kan nunnak cu donharnak hnakin lungawi thusimnak ah a cangsawn ding asi (Phi 4:6-7).
KZbin:
C-Ministry Music- / cministrymusic
C-Ministry Sermon- / cministry
FB & IG
Facebook Page: / christcanchange
Instagram IG: / c.ministry19
Email:
[e-mail]

[@LanaBoih]

Amen thazang tampi ka ngah