Рет қаралды 35,082
باسم الله نبدا مدحي
باسم الله يكمل فرحي
باسم الله هي ربحي
راها سبقت فكتاب الله
بديت قولي بحروف الليف
لا تحاشمني يا لطيف
لأنني عبدك ضعيف
و العبد رجوعو لله
بجاه حرف البا
والاشراف وجميع الطلبا
نطلب زورة للكعبة
نمشي لسيدي ننظر بهاه
بجاه الثوابتة
لا تخلي روحي توتى
يا المولى نرجاك انت
ولا نصيب تم غير الله
توب يا راسي يا ساهي
يا اللي تابع لملاهي
لاين وانت يا فاهي
خالف النفس مع الشيطان
ما تنفعك والو حيلة
يا الغري فذيك الليلة
آه يا نفسي لهبيلة
راه افعالي تم نلقاه
اجميع ما درنايتأدى
يوم لوقوف يوم الشدة
لا تشفي فينا لعدا
يا المولى فضلك نرجاه
ابدا تخمم في يوم الموت
يوم يوفى الاجل ويفوت
ما بقى يزهى ليا قوت
يجفا نومي من الاعيان
نكون فوق فراشي مشبوح
من الاضرار نعاني ونبوح
كل ساعة نبوه وانوح
من فراق اهلي والعشران
منين عراقو ليا الجبنين
ابداتني الموت من الرجلين
جاوني جوج الملاكين
كيقولو ليا فلان
تم ليك الرزق والاجل
راك اليوم انت يا راحل
وسط قبرك غادي تنزل
مت مسلم مع الايمان
من بعد ذوك الملكين مشاو
نشوف وليداتي يتبكاو
عند راسي كيتزكاو
و المعزي عليا جدبان
ما جبرت القدرة ليهم
باش نوقف و نعنقهم
ما سخى قليبي بيهم
آه بقى لي عقلي حيران
ما بقيت نرد ليهم بال
كنخمم غير في لفعال
ياك لجوارح ولاو ثقال
كيف ثقال عليا اللسان
كنشهد غير بصبعي
على خدودي حايف دمعي
وأنا رافع صبعي
بلا إله إلا الديان
منين شهدت على الختمة
قطرو لي في فمي الما
اهبط ملاك بالعزمة
اقبض روحي ومشى عجلان
منين سافرت الروح مشات
بقات ذاتي خشبة بردات
ناض عني قوة لغواث
بالنسا و ارجال وصبيان
كل ناسي دهشو مني
ولا من باقي يوصلني
حتى اولادي خافوا مني
منين تسدو عليا لمكان
خرجو نعشي وسط الدار
راه الطلبة تقرا الاسوار
بزز مني نخوي الاوكار
سخاو بيا اجميع الرفقان
مشاو حفروا قبري فخلا
ياك دارو الما في سطلا
عل الجمر داروها تغلا
ثم جابو ليا لكفان
لبسوني كفني وافي
لحنوط في كل اطرافي
لا دوا من الموت يشافي
غير لوقوف بيد الرحمان
رسلوا اللي رفاعا
جاوني دغيا باسراعا
من وراهم الجماعة
ناس الحيا وهل الايمان
رفدوني ربعة الناس
يمشو مشية بالتكياس
على الجنازة صلات الناس
صلاة لوقوف مع الحرمان
تركوني في قبري مكبوب
ثقلوني بحجر و طوب
جيت نهرب ما صبت هروب
ضامني الأرض ضمان
قلت ليها يا أرض الله
ليك جيت طالب ضيف الله
ادخيل ليك برسول الله
عين الرحمة سيد لكوان
يا أرض الله سمحي ليا
رانا مرتك فالدنيا
اليوم جيتك رفقي بيا
وشحال محنتك من تمحان
قالت ليا في صح القول
ولايني انت يا مهبول
شحال من واحد كان يصول
بين لمنازه والبنيان
فين هم الجبابرة
العامية ليهم البصيرة
كلهم سكنو فالآخرة
فين اللي كانوا طغيان
منين استويت في قبري
رجعت الروح لصدري
جاتني لملايك تجري
كيقولو لي يا فلان
أشنو ربك قالوا ليا
وشكون نبيك في الانبيا
آش كنت تعبد فالدنيا
واشنو دينك في الاديان
قلت ليهم ربي واحد
لا وزير في ملكو واجد
و شفيع امتو محمد
جاب لفرايض مع السنن ■